Samningsmarkmið svipuð og áður
Deildarfundur sauðfjárbænda samþykkti þau áhersluatriði sem verða höfð til hliðsjónar við gerð nýrra búvörusamninga.
„Það var almenn sátt um þau markmið sem voru þar sett á blað,“ segir Eyólfur Ingvi Bjarnason, formaður deildarinnar. Sauðfjárbændur vilja halda samningum sínum við hið opinbera í stórum atriðum óbreyttum, en Eyjólfur segir þá vera vanfjármagnaða eins og þeir eru í dag. Búgreinadeildin leggur áfram áherslu á að stærstur hluti af stuðningsgreiðslum verði í gegnum greiðslumark, gæðastýringu og býlisstuðning.
Skoða breytta útfærslu greiðslumarks
„Svo kom inn ný tillaga um að það væri horft frekar til framleiðslu á kílóum kjöts á hvert ærgildi í staðinn fyrir ásetningshlutfall. Það var samþykkt, en það á eftir að útfæra hver framleiðsluskyldan á að vera ef þetta er eitthvað sem viðsemjandinn vill,“ segir Eyjólfur.
Samkvæmt umræðum fundarins finnst honum sennilegt að miðað verði við 10 til 12 kíló lambakjöts fyrir hvert ærgildi. „Þetta styður við loftslagsvegvísi Bændasamtakanna sem miðar að því að framleiða sem mest af matvælum á sem hagkvæmastan hátt fyrir þann pening sem ríkið deilir út.“ Í dag þurfa bændur að eiga að lágmarki 0,6 vetrarfóðraðar kindur fyrir hvert ærgildi greiðslumarks til að fá óskertar beingreiðslur.
Eyjólfur bætir við að á fundinum hafi verið samþykkt tillaga um örmerki. Þó svo að endanleg útfærsla sé ekki komin á hreint sé þetta skref í þá átt að fastsetja örmerkjanotkun í sauðfé. „Markmiðið er að stuðla að vinnusparnaði og einfalda kerfið þannig að þetta muni henta bændum jafnt sem sláturleyfishöfum og allir hagnast á þessu.“
Litlar breytingar á stjórn
Fyrir fundinn voru fjórar nefndir búnar að vinna úr 71 tillögu. Þar voru þær ýmist sameinaðar, felldar niður af ýmsum ástæðum eða lagðar fyrir deildarfundinn. Þær tillögur sem voru samþykktar af deildarfundinum verða ýmist sendar áfram til Búnaðarþings eða ræddar áfram af stjórn deildarinnar sem sendir þær til viðkomandi aðila.
„Það skiptir máli að bændur komi saman og ræði sín hagsmunamál og hver stefnan á að vera í framhaldinu. Þó að það sé hægt að halda alla svona fundi á netinu þá skiptir líka máli að hittast í eigin persónu. Það verða öðruvísi skoðanaskipti þannig,“ segir Eyjólfur. Kosið er um formann deildarinnar annað hvert ár, en Eyjólfur hefur setið í því embætti síðan í fyrra og á eitt ár eftir af kjörtímabilinu. Meðstjórnendur eru fjórir og er kosið um helming þeirra annað hvert ár. Birgir Þór Haraldsson var kjörinn til stjórnarsetu og kemur hann nýr í stjórn í staðinn fyrir Hafdísi Sturlaugsdóttur sem gaf ekki kost á sér. Ásta Fönn Flosadóttir var í stjórn áður og var kosin til þess að sitja áfram. Aðrir meðstjórnendur eru Magnús Helgi Loftsson og Sigurborg Hanna Sigurðardóttir og var ekki kosið um þau á þessum fundi. Kosið var um varamenn og er sá fyrsti Sigríður Ólafsdóttir, annar varamaður er Sveinn Finster Úlfarsson og þriðji varamaður er Jónmundur Magnús Guðmundsson.
