Ný byggingarefni í þróun úr þarahrati

Nýsköpunarverkefnið Þarahrat gengur út á að endurvinna lífrænan úrgang frá smáþörungaframleiðslu til þróunar og framleiðslu á efni sem getur haft fjölbreytta notkunarmöguleika, til að mynda í byggingariðnaði.

Verkefnið var tilefnt til Nýsköpunarverðlauna forseta Íslands á þessu ári, en það hefur verið í þróun frá sumri 2023 eftir að hafa fengið styrk úr Nýsköpunarsjóði námsmanna þar sem markmiðið var að skapa ný verðmæti úr úrgangi.

Sólrún Arnarsdóttir og Ísafold Kristín Halldórsdóttir eru frumkvöðlarnir sem standa að Þarahrati og segir Sólrún að með því að nýta þessar úrgangsauðlindir í stað mengandi hráefna loki verkefnið hringrás staðbundins iðnaðar og skapi verðmæti. Þessi nýju efni séu vistvæn og framleiðsla þeirra með lítið kolefnisspor.

Loka hringrásarkerfinu við þörungaframleiðslu

Sólrún segir að urðun úrgangs sé stórt vandamál á Íslandi og á heimsvísu og mikilvægt sé að þróa lausnir núna sem hjálpi okkur að takast á við afleiðingar af neyslunni.

„Hugmyndin snýst um að breytt efnisval og framleiðsla geti minnkað eða komið í veg fyrir losun kolefnis, mengun jarðvegs og skaðleg inngrip í lífríki til þess að nálgast endanlegar auðlindir.

Í verkefninu könnum við möguleikann á því að loka hringrásarkerfinu með því að nýta vannýtta en óendanlega auðlind, sem í dag er úrgangur úr staðbundinni framleiðslu, til þess að þróa ný efni með margvíslega nýtingarmöguleika.

Grunnhráefnið er þurrt hrat sem fellur til hjá Algalíf í Grindavík, sem ræktar smáþörunga til framleiðslu á bætiefninu Astaxantín. Á ári hverju falla til um 70–95 tonn á ári af efninu, sem er jafnframt eini úrgangur framleiðslunnar,“ segir Sólrún.

Í stað einnota pakkninga

Að sögn Sólrúnar eru næstu skref að þróa efnin markvisst með ákveðna nýtingarmöguleika í huga til þess að leysa vandamál á borð við pakkningar, skaðleg efni í byggingariðnaði og tímabundnar innréttingar.

„Við erum enn þá á rannsóknarstigi í vöruþróun, en ætlum að fara í markaðsgreiningu áður en við ákveðum hvaða vörur við ætlum að þróa. Við ætlum ekki bara að takmarka okkur við úrganginn frá Algalíf, heldur leitum leiða til að koma fleiri tegundum af úrgangi í gagn. Við vonumst til að hefja samstarf við fleiri fyrirtæki og þróa fjölbreytt efni.

Við höfum verið að vinna verkefnið sjálfstætt en svo erum við núna að klára sex vikna viðskiptahraðal, Hringiðu+ hjá Klak, sem hefur hjálpað okkur mjög mikið.“