Mikið álag á dreifikerfi raforku vegna lágrar vatnsstöðu í miðlunarlónum
Vatnhæð í Þórisvatni hefur aldrei mælst lægri að sumarlagi en nú í sumar. Í frétt á vef Landsnets kemur fram að slæm staða á nokkrum miðlunarlónum valdi gríðarlegu álagi á byggðalínuna sem er talin vera komin að þolmörkum.
Ekki er talin hætta á raforkuskorti í vetur en staðan í Þórisvatni er sögð vera áminning um mikilvægi þess að geta flutt raforku milli landshluta hverju sinni.
Staðan á miðlunarlónum á Norður- og Austurlandi er hins vegar sögð vera ágæt.
Haft er eftir Guðmundi Inga Ásmundssyni, forstjóra Landsnets, að þörf sé á að endurnýja byggðalínuna sem sé orðin meira en 40 ára gömul. „Rekstur byggðalínunnar hefur verið þungur í sumar en orkuflutningar á milli landshluta þar sem lónstaðan er góð og þangað sem hún er verri hefur valdið því að flutningur hefur verið við öryggismörk í allt sumar,“ segir Guðmundur Ingi. „Við þessar aðstæður má lítið út af bregða til að raforkunotendur verði fyrir truflunum. Mikið álag eða fullnýting lína eykur flutningstöp og leiðir til að verri nýtingar virkjana. Þetta hefur í för með sér lakari árangur í umhverfis- og loftslagsmálum auk þess sem kostnaður við orkukaup vegna flutningsins eykst verulega.“
Tvær stórar uppfærslur í vinnslu
„Sú staða sem nú er uppi sýnir hversu brýn uppbygging flutningskerfis raforku er, sérstaklega tenging landshlutanna. Við hjá Landsneti höfum lengi bent á nauðsynlega endurnýjun byggðalínunnar, sem nú er yfir 40 ára gömul, þannig að við getum mætt betur áskorunum framtíðarinnar vegna loftslagsbreytinga og rafvæðingar,“ segir Guðmundur Ingi enn fremur á vef Landsnets.
Landsnet vinnur nú að tveimur stórum áföngum að uppfærslu nýrrar kynslóðar byggðalínunnar; fyrri hlutinn er á milli Kröfluvirkjunar og Fljótsdalsvirkjunar, um Hólasand, til Akureyrar, en hinn hlutinn er tenging Blönduvirkjunar við Eyjafjarðarsvæðið og lína frá Hvalfirði yfir Holtavörðuheiði að Blönduvirkjun.
