Vinsamlegast athugið að þetta efni er eldra en 5 ára.
Gamli Akureyrarvagninn er nú í akstri um Grímsey og hér er hann við vitann í Grímsey.
Gamli Akureyrarvagninn er nú í akstri um Grímsey og hér er hann við vitann í Grímsey.
Mynd / Halla Ingólfsdóttir
Fréttir 24. júlí 2017

Með strætó norður yfir heimskautsbaug

Höfundur: Margrét Þóra Þórsdóttir
„Það hefur verið vel tekið í þetta uppátæki og það má segja að byrjunin lofi góðu,“ segir Sigurður Bjarnason, eigandi Vélaverkstæðis Sigurðar Bjarnasonar í Grímsey, en fyrirtækið keypti strætisvagn frá Akureyri og býður upp á akstur um eyjuna. Vagninn kom til Grímseyjar í byrjun júní og er fyrsti almenningsvagninn í sögu hennar.  Vagninn var áður í notkun á Akureyri og tekur 23 farþega í sæti auk þess sem rými er fyrir standandi farþega.
 
Samstarf er á milli Sigurðar og Höllu Ingólfsdóttur, leiðsögumanns og eiganda fyrirtækisins Arctic Trip í Grímsey, en það fyrirtæki sérhæfir sig í afþreyingarþjónustu í eynni. Hugmyndin er að bjóða ferðir gegn vægu gjaldi fyrir ferðamenn og gesti í eyjunni, m.a. út að vita á suðurenda eyjarinnar og eins norður að heimskautsbaug, en þangað fýsir ferðalanga mjög að koma og fá staðfestingu á komu sinni þangað. 
 
Strætisvagninn var fluttur með ferjunni til Grímseyjar í byrjun júní og hér er verið að aka honum upp á bryggju.
 
Byrjaði sem grín
 
„Þetta byrjaði allt sem grín, en ég hef nú samt verið að velta fyrir mér hvort grundvöllur væri fyrir að bjóða þjónustu af þessu tagi,“ segir Sigurður. Nú í sumar hafa 29 skemmtiferðaskip viðkomu í Grímsey og hefur þeim um árin farið fjölgandi. Þá er flogið daglega út í eyju frá Akureyri og ferjan Sæfari siglir frá Dalvík fimm daga vikunnar út í eyju. Ferðafólki hefur með árunum fjölgað í Grímsey og má búast við vaxandi straumi þangað. Ferðaþjónustu í eynni hefur í takt við það vaxið fiskur um hrygg. Nú er á vegum Hafnasamlags Norðurlands unnið við að bæta aðstöðu við höfnina, gera aðkomuna snyrtilegri og einnig verður reist hús þar sem er mótttaka og salernisaðstaða.
 
Margir farþega skipanna eiga erfitt með gang
 
„Flestir farþeganna t.d. af skemmtiferða­skipunum vilja komast yfir heimskautsbauginn, en margir þeirra eru í hópi eldri borgara og ekki allir góðir til gangs. Það má segja að það hafi verið kveikjan að kaupum á þessum vagni. Margir hafa verið að snapa sér far með heimamönnum, biðja þá að skulta sér norður eftir. Við eigum hins vegar eftir að sjá hvernig þetta kemur út og hvort grundvöllur er fyrir þessu. En byrjunin lofar góðu,“ segir Sigurður.
 
Fyrirtæki Sigurðar Bjarnasonar keypti strætisvagninn og sér hann sjálfur um aksturinn.
 
Átti hæsta boð í vagninn
 
Vagninn var auglýstur til sölu á liðnum vetri, Sigurður átti hæsta boð og fékk vagninn, verðið var vel viðráðanlagt, að sögn. Vagninn var fluttur með ferjunni út í eyju í byrjun júní og hefur farið nokkrar ferðir sem heppnast hafa ágætlega. „Það er margt hér sem menn vilja sjá og við ökum hér út að heimskautsbaug, skoðum vitann og kirkjuna og förum fram að bjargi þar sem hægt er að fylgjast með lundanum,“ segir hann.  Sjálfur hafði Sigurður einu sinni á ævinni tekið sér far með strætisvagni, fyrir allmörgum árum suður í Reykjavík þar sem systir hans starfaði við akstur. „Ég og konan tókum einn rúnt með henni aðallega til gamans,“ segir hann.
 
Vaxandi ferðaþjónusta
 
Sigurður ekur vagninum, en Halla Ingólfsdóttir, eigandi Arctic Trip, sér um leiðsögn í ferðunum.  Fyrirtæki hennar sérhæfir sig í afþreyingarferðum í Grímsey og fer starfsemin vaxandi. Meðal annars eru í boði dagsferðir þar sem allt er innifalið, ferð með ferjunni, leiðsögn um eyjuna og veitingar. Þá er köfun einnig í boði hjá fyrirtækinu sem og snork sem vakið hefur athygli. „Við erum að fóta okkur áfram, það tekur alltaf tíma að kynna sig og láta vita af því sem er í boði, en það gengur ágætlega,“ segir Halla. 
 
Hún segir Grímseyinga hafa á undanförnum árum byggt upp ferðaþjónustu í eynni, fyrir hendi séu tvö gistiheimili, tjaldsvæði og þar er veitingasala. „Það er draumurinn að geta byggt hér upp fleiri störf í þessum geira, þannig að lífið hér væri ekki bara fiskur. Það er margt skemmtilegt og spennandi í gangi nú þegar og fjölbreytnin mun án efa aukast til framtíðar. Margir sem hingað koma eru í leit að kyrrð og friðsæld, snertingu við náttúruna og að sjá eitthvað annað og öðruvísi en í boði er annars staðar. Fyrir okkur vakir að fá tekjur til að standa undir kostnaði við rekstur vagnsins og eitthvað upp í laun. „Við ætlum ekki að bjóða fastar ferðir í sumar samkvæmt áætlun heldur spila eftir eyranu, sjá hver eftirspurnin verður og þróa þetta verkefni í samræmi við hana,“ segir Halla. 
Úrskurður MAST felldur úr gildi
Fréttir 1. febrúar 2023

Úrskurður MAST felldur úr gildi

Matvælaráðuneytið hefur fellt úr gildi úrskurð Matvælastofnunar sem hafði stöðva...

Enn versnar rekstrarafkoma skuldsettra kúabúa
Fréttir 31. janúar 2023

Enn versnar rekstrarafkoma skuldsettra kúabúa

Ráðgjafarmiðstöð landbúnaðarins (RML) hefur lokið við greiningu á rekstri 154 kú...

Skordýr sem fóður og fæða
Fréttir 31. janúar 2023

Skordýr sem fóður og fæða

Við Landbúnaðarháskóla Íslands er unnið verkefni sem snýr að því að koma upp sko...

Arabískt fyrirtæki fjárfestir í Atmonia
Fréttir 30. janúar 2023

Arabískt fyrirtæki fjárfestir í Atmonia

Efnafyrirtækið Sabic Agri-Nutrients hefur keypt einkarétt á notkun tækni Atmonia...

35 kindur drápust í bruna
Fréttir 30. janúar 2023

35 kindur drápust í bruna

„Aðkoman var óhugnanleg og þetta er mikið áfall,“ segir Guðjón Björnsson, bóndi ...

Innflutningur erfðaefnis skilar góðum árangri
Fréttir 27. janúar 2023

Innflutningur erfðaefnis skilar góðum árangri

Samkvæmt niðurstöðum Ráðgjafarmiðstöðvar landbúnaðarins (RML) úr skýrsluhaldi na...

Verðskrá Skeljungs og Fóðurblöndunnar
Fréttir 27. janúar 2023

Verðskrá Skeljungs og Fóðurblöndunnar

Skeljungur og Fóðurblandan hafa birt verðskrá fyrir þær tegundir af áburði sem f...

Ekkert veiðibann á döfinni
Fréttir 26. janúar 2023

Ekkert veiðibann á döfinni

Veiðibann á grágæs hefur ekki tekið gildi á Íslandi og ekki stendur til að banna...