Hefjast handa í sumar og fyrsti áfangi klár snemma á næsta ári
Framkvæmdir við byggingu nýs gagnavers við Akureyri hefjast fyrri hluta komandi sumars og er gert ráð fyrir að þeim ljúki og fyrsti áfangi gagnaversins verði tekinn í notkun á fyrri hluta næsta árs.
Gagnaverið mun fjölga störfum í hátækniiðnaði á svæðinu, en um 15 ný störf skapast í kringum starfsemi þess. Það er fyrirtækið atNorth sem stendur fyrir framkvæmdum.
Eyjólfur Magnús Kristinsson, forstjóri atNorth, og Ásthildur Sturludóttir, bæjarstjóri á Akureyri, rituðu undir viljayfirlýsingu um byggingu og rekstur gagnaversins á Akureyri á Listasafninu á Akureyri. Samkvæmt viljayfirlýsingunni leigir fyrirtækið lóð til starfseminnar á skipulögðu athafnasvæði í útjaðri bæjarins en þetta verkefni er liður í uppbyggingu græns iðnaðar í höfuðstað Norðurlands.
Lóðin sem um ræðir er ætluð undir hreinlega umhverfisvæna starfsemi. Athafnasvæðið allt er um 6,5 hektarar að stærð.
Dreifa starfseminni og áhættunni
„Akureyri er mjög fýsilegur kostur fyrir þessa starfsemi,“ segir Eyjólfur, en félagið rekur gagnaver í Hafnarfirði, Reykjanes- bæ og Stokkhólmi í Svíþjóð og er mikil eftirspurn eftir þjónustu þess. Í kjölfar eldgossins í Geldingadölum á Reykjanesi í fyrra hafi umræða um að skoða fleiri staði farið af stað, enda ákveðinn veikleiki að vera með allt á sama stað.
„Með því að dreifa starfseminni dreifum við líka áhættunni,“ segir hann.Möguleikar hafi opnast til að setja á fót orkufrekan iðnað á Akureyri með tilkomu Hólasand- línu 3 sem liggur milli Akureyrar og Hólasands og eins Blöndulínu sem liggur til Akureyrar frá Blönduvirkjun.
„Eftir að raforkumálin í Eyjafirði eru komin í betra horf er Akureyri einn besti kostur sem hægt er að hugsa sér fyrir starfsemi gagnavers,“ segir Eyjólfur.
Þekking til staðar og góðar samgöngur
Þar komi nokkrir þættir til sem skipti sköpum, en auk þess sem afhendingaröryggi raforku er fyrir hendi nú, er fyrir á svæðinu þekking sem nauðsynleg er og þá eru samgöngur góðar, gott innanlandsflug og innan tíðar bætist beint flug til útlanda við.
„Það eru líka til staðar fyrirtæki sem geta veitt okkur þjónustu við reksturinn og viðhald á tæknibúnaði okkar,“ bætir hann við.
Fyrirtækið mun bæði veita erlendum og innlendum viðskiptavinum þjónustu frá gagnaverinu á Akureyri. „Vistun og vinnsla gagna fer þá fram á fleiri stöðum en áður, aðgengi að gagnatengingum úr landi verður betra og öryggismálum verður enn betur fyrir komið,“ segir Eyjólfur.
Eyjólfur segir að hafist verði handa við framkvæmdir í byrjun sumars og gert ráð fyrir að hægt verði að taka gagnaverið í notkun einhvern tíma á fyrsta ársfjórðungi næsta árs.
„Við höfum undirbúið málið vel og það tekur ekki langan tíma að reisa byggingarnar,“ segir hann. Kostnaður við fyrsta áfanga verksins nemur á bilinu 2 til 3 milljarða króna og gert er ráð fyrir að um 15 starfsmenn starfi við gagnaverið til að byrja með.
Jákvæð samfélagsáhrif
Ásthildur Sturludóttir, bæjarstjóri á Akureyri, fagnaði þeirri uppbyggingu sem fyrirtækið atNorth er að hefja á Akureyri og segir hana styrkja atvinnulífið á svæðinu.
„Þetta verkefni rímar vel við nýlegar innviðaframkvæmdir á Norðausturlandi sem tryggja raforkuflutning inn á svæðið. Aukið öryggi í flutningi raforku inn á Eyjafjarðarsvæðið gerir uppbyggingu af þessu tagi mögulega með öllum þeim jákvæðu samfélagsáhrifum sem fylgja,“ segir Ásthildur.
