Háskólasamstæða mikilvæg
Háskóli Íslands og Háskólinn á Hólum verða samstæða frá næstu áramótum og er það talið efla samkeppnishæfni beggja skóla.
Rektorar Háskóla Íslands (HÍ), Háskólans á Hólum (HH) og háskólaráðherra undirrituðu síðla aprílmánaðar samkomulag um stofnun háskólasamstæðu með þátttöku þessara tveggja háskóla. Samstæðan tekur formlega til starfa þann 1. janúar á næsta ári en henni er ætlað að bæta samkeppnishæfni háskólanna tveggja ásamt því að auka gæði náms, rannsókna, stoðþjónustu og auka tengsl við atvinnulíf og samfélög um land allt. Háskólasamstæðan mun starfa undir nafni Háskóla Íslands. Þetta kemur fram í tilkynningu frá háskólunum.
Mikilvægt byggðaþróunarverkefni
Samkvæmt samkomulaginu er háskólasamstæðunni ætlað að styrkja HÍ sem leiðandi háskóla í íslensku samfélagi og HH, sem verður Háskóli Íslands á Hólum, sem sérhæfðan háskóla á landsbyggðinni. Akkur er talinn vera í samþættingu hérlendra háskóla í alþjóðlegri samkeppni. Ætlunin er að samþætta prófgráður, auka þjónustu við nemendur og kennara, bæta aðferðir við kennslu og auka rannsóknasamstarf.
Hólmfríður Sveinsdóttir, rektor Háskólans á Hólum, sagði við undirritunina að háskólasamstæðan muni auka tækifæri til nýsköpunar í nánu samstarfi við sterkar atvinnugreinar á Norðurlandi vestra og landsbyggðinni allri. Stofnun háskólasamstæðu Háskóla Íslands væri því eitt mikilvægasta byggðaþróunarverkefni Íslands í dag.
Áætlað er að fá fleiri inn í samstæðuna til að styrkja hana og um leið íslenskt háskólakerfi. Kapp verður þó lagt á að hver aðili að samstæðunni haldi sérstöðu sinni, ásamt áherslu á uppbyggingu nauðsynlegra innviða til að styrkja samstæðuna í vaxandi alþjóðlegri samkeppni um fjármagn, nemendur og starfsfólk.
Stjórnskipulag samstæðunnar tekur mið af skipulagi HÍ. Yfir henni verður einn háskólarektor og eitt háskólaráð en samstarfsráð verður skipað til að fara með mikilvægar ákvarðanir sem lúta að samstarfi aðildarháskóla. Núverandi rektorsembætti Háskólans á Hólum breytist í forseti Háskóla Íslands á Hólum.
Miðað er við að samstæðan starfi með sameiginlega kennitölu og fjárlaganúmer frá 1. janúar 2026 og að frá þeim tíma heyri allir starfsmenn og nemendur aðildarháskólanna undir samstæðuna.
Fjölga á störfum í Skagafirði
Segir í tilkynningu háskólanna að samstæðan muni reka sameiginlega stjórnsýslu og stoðþjónustu og muni starfa víða um land en hafa meginstarfsstöðvar í Reykjavík og í Skagafirði. Í tengslum við ráðningar í störf, t.d. í stjórnsýslu og stoðþjónustu samstæðunnar, verður leitast við að fjölga störfum sem staðsett eru í Skagafirði.
Gert er ráð fyrir uppbyggingu aðstöðu á Hólum, m.a. húsnæði fyrir kennslu og rannsóknir í fiskeldis- og fiskalíffræði og hestafræði. Auk þess verður uppbygging á innviðum og aðstöðu til rannsókna á Sauðárkróki. Stofnun rannsóknasetra Háskóla Íslands mun flytja höfuðstöðvar sínar í Skagafjörð þar sem leitt verður starf setra um allt land með tugi vísindamanna og fjármagn til rannsókna í sterkum tengslum við samfélag og atvinnulíf.
