Röðuðu sér í efstu sætin í öllum keppnisflokkum

Íslenskir matreiðslumenn gerðu góða ferð til Herning í Danmörku á Norðurlandamót matreiðslumanna sem haldið var dagana 29. og 30. mars. Náðu þeir besta heildarárangri Íslendinga á þessu móti og röðuðu sér í efstu sætin í öllum flokkum. sem haldið var dagana 29. og 30. mars. Náðu þeir besta heildarárangri Íslendinga á þessu móti og röðuðu sér í efstu sætin í öllum flokkum.

Sindri Guðbrandur Sigurðsson náði öðru sæti í keppninni um nafnbótina Matreiðslumaður Norðurlandanna árið 2022, en norski keppandinn varð sigurvegari. 

Gabríel Kristinn Bjarnason sigraði í keppninni um útnefninguna „besti ungkokkur Norðurlandanna“. Matreiðslumeistarinn Sveinn Steinsson og útskriftarneminn Aþena Þöll Gunnarsdóttir kepptu saman í liðakeppni í flokknum „Nordic Green Chef“ og lentu í öðru sæti. Um nýjan keppnisflokk er að ræða þar sem unnið er með grænmetisfæði. 

Besti ungkokkur Norðurlanda, Gabríel Kristinn Bjarnason.

Betri árangur en vonast var eftir 

Þátttaka Íslendinga á Norðurlandamótinu er á vegum Klúbbs íslenskra matreiðslumeistara. Í tilkynningu frá klúbbnum er haft eftir Þóri Erlingssyni, forseta hans, að hann sé himinlifandi með árangur keppendanna. „Þau hafa staðið sig frábærlega og unnið þetta af mikilli fag­mennsku. Nú fögnum við og svo förum við á fullt í næsta verkefni sem er heimsmeistara­keppnin í Lúxemborg í nóvember komandi.“

Aþena Þöll Gunnarsdóttir.

Sveinn og Aþena kepptu sem lið, eins og fyrr segir en þessi keppnisflokkur hefur verið í undirbúningi hjá samtökum matreiðslu­manna á Norður­lönd­unum um nokkurt skeið og er gert ráð fyrir að þessi keppni, eða sam­bærileg, eigi eftir að verða að alþjóðlegri keppni. „Þetta er betri árangur en ég hefði þorað að vona,“ var haft eftir Sveini þegar úrslitin lágu fyrir.

Sveinn Steinsson.