Gúmmístígvél fyrir sumarið

Fyrir þá sem áætla að njóta sumarsins hérlendis er ekki seinna vænna en að fjárfesta í góðum og helst vistvænum gúmmístígvélum.

Stígvél komu hér fram á sjónarsviðið á síðustu öld og þóttu mikil bylting fyrir landsmenn enda þykir engum gott að vera votur í fæturna. Voru þau stígvél úr sama hrágúmmíi og bíldekk enda hagnaðist víst Goodyear-umboðið þó nokkuð fyrir framleiðslu á hvort tveggja.

Á meðan saga gúmmís teygir sig yfir í fornar siðmenningar á borð við Maya-þjóðirnar var notkun þess á þeim tíma heldur takmörkuð. Upphaflega áttaði fólk sig á að safa gúmmítrjáa mætti nota við gerð bolta, ýmissa íláta og skjólfatnaðar, en það var ekki fyrr en á 18. öld sem gúmmí hlaut meiri athygli frá hinum vestræna heimi.

Fyrstu skrefin

Árið 1735 kynntist franski landkönnuðurinn Charles-Marie de la Condamine því að heimamenn Amazon notuðu gúmmí við gerð vatnsheldra íláta. Honum þótti þetta svo forvitnilegt að hann tók með sér sýni aftur til Evrópu og kynnti þannig gúmmí fyrir vísinda- og iðnaðarheiminum. Þetta undraefni varð fljótt eftirsótt, en þó hvorki nægilega sterkt né sveigjanlegt til þess að hægt væri að nýta það að ráði – fyrr en bandaríski uppfinningamaðurinn Charles Goodyear fann rétta blöndu þess við þá brennistein og önnur efni. (Dekkjafyrirtækið Goodyear nefndi akkúrat fyrirtæki sitt í höfuðið á honum árið 1898).

Rannsóknir sem gerðar hafa verið á undanförunum árum hafa þó sýnt fram á að oft er mikið magn af blýi, kadmíum og þalötum notað við framleiðslu regnfatnaðar, þar á meðal stígvéla, og nærri má geta að sú blanda er alls ekki af hinu góða.

Umhverfisvæn ákvörðun

Því má líta á listann hér að neðan og kaupa sér stígvél sem unnin eru með umhverfisverndarsjónarmið alheimsins í huga. Athugið að ef pantað er yfir netið bætist sendingarkostnaður við og svona...

Will's Vegan Store er vörumerki sem framleiðir vegan skófatnað, fatnað og fylgihluti. Vörumerkið selur úrval af vatnsheldum skóm, en eina gerð regnstígvéla, sem bera heitið WVSport Waterproof Country Boots. Verð: $124–$186, eða 17–25 þúsund ísl. kr.

Merry People's regnstígvélin eru framleidd úr náttúrulegu gúmmíi og límd saman með vegan lími, en fyrirtækið býður að auki upp á 12 mánaða ábyrgð. Þau allra vinsælustu eru Chelsea ökklastígvél sem kosta $60–$170, eða 8–24 þúsund kr.

Thesus er merki sem framleiðir sjálfbæran skófatnað úr vistvænum efnum á borð við endurunnið gúmmí og endurunnið nælon. Nýverið kynnti Thesus 'Anyway Rainboot', handsmíðuð ökklastígvél frá fjölskyldurekinni verksmiðju í Portúgal. Þessi dásemd kostar $158, eða 22 þúsund ísl. kr.

Everlane er tískumerki sem framleiðir fatnað, skó og fylgihluti og hefur á síðastliðnum árum tekið framförum er kemur að framleiðslugagnsæi svo og notkun endurunninna efna.

Ökklastígvél úr gúmmíi eru hvað vinsælust og mega neytendur m.a. fræðast um frá hvaða verksmiðju hver og ein stígvél koma. Verð ökklastígvélanna vinsælu er í lægri kantinum, eða $34–$85, eða 5–12 þúsund ísl. kr.

Native er þekkt fyrir að búa til vatnsvæna skó sem hægt er að nota nánast hvar sem er. Sugarlite línan þeirra er afar vinsæl en þar innihalda skórnir blöndu af hefðbundnu EVA (Ethylene-vínyl acetate/létt og endingargóð froða) og sykurreyrsefni. Þessir vatnsheldu skór kosta $32–$55 eða 4–8 þúsund ísl. krónur.

Þegar kaupendur hafa nýtt skó sína til fullnustu má senda þau aftur til fyrirtækisins, en þar verða þeir endurunnir sem efni fyrir leiksvæði í gegnum Remix Project sem hægt er að kynna sér betur á vefsíðu fyrirtækisins.

Grey Label er hollenskt vörumerki sem framleiðir regnstígvél úr náttúrulegu gúmmíi fyrir börn, fáanleg í sex mismunandi litum.

Stígvélin eru framleidd með lífrænum striga að innan en fyrirtækið er GOTS vottað og allar umbúðir PVC-lausar og unnar úr endurunnum efnum. Verð: $57, eða þúsund ísl. kr.

Aigle er franskt vörumerki sem hefur selt fatnað og skó fyrir öll veður, en er sérstaklega þekkt fyrir regnstígvél sín. Þau eru framleidd úr náttúrulegu gúmmíi og innihalda staðlaðar gerðir um 30 til 35% af endurunnu gúmmíi frá Víetnam og Taílandi, í gegnum FSC vottað kaupferli. (Forest Stewardship Council, viðurkenning sjálfbærs skóglendis). Fyrirtækið er afar vistvænt en það endurnýtir einnig 54% þess úrgangs sem verður til á framleiðslustað þess og endurnýtir 90% af óunnnu gúmmíi. Geri aðrir betur. Fyrir þá sem hafa áhuga á að versla þar stígvél er verðið af ýmsum toga, frá $28–$430 eða 4–60 þúsund ísl. kr.

Að lokum verður að taka fram að auðvitað standa gömlu góðu gúmmískórnir alltaf fyrir sínu ef gengur illa að panta ofangreind stígvél af netinu. Þá má finna hér og hvar um landið, m.a. eru Viking gúmmískór hjá Fóðurblöndunni í stærðum 36–47 á kr. 6.500 og hjá Byko, undir heitinu „Klassískir gúmmískór“, í stærðum 19–47 á kr. 5.695, svo eitthvað sé nefnt.