Fjöldi Íslendinga á Evrópumóti taflfélaga
Evrópumóti taflfélaga lauk á dögunum á grísku eyjunni Ródos. Þangað mætti metfjöldi íslenskra skáksveita, eða fimm talsins í opnum flokki og ein kvennasveit. Hvorki fleiri né færri en 38 Íslendingar tefldu fyrir íslenskar skáksveitir auk Óskars Bjarnasonar sem tefldi fyrir félag frá Lúxemborg. Íslensku liðin voru Taflfélag Reykjavíkur, Skákfélag Akureyrar, Skákdeild Fjölnis, Skákdeild Breiðabliks og Dímon, ásamt kvennasveitinni sem keppti undir merkjum Íslands.
Bestum árangri íslenskra sveita náði Taflfélag Reykjavíkur: 35. sæti eftir að hafa verið skráð nr. 38 í styrkleikaröð af liðunum 102 í opnum flokki. Bestum einstaklingsárangri náði hins vegar enginn annar en stórmeistarinn og goðsögnin Jóhann Hjartarson! Jóhann mætti í hálftímalangt viðtal til mótshaldara meðan á móti stóð og fjallaði um ýmsa gamla meistara og kynni sín af þeim, t.d. þeim Viktori Kortsnoj og Bobby Fischer.
Nokkuð var um titilskákir í mótinu. Á nokkrum stórmótum er hægt að næla sér í Fide-titla, með ákveðnum árangri. Evrópumót taflfélaga er eitt af þeim mótum. Bogi Pálsson hjá Skákfélagi Akureyar hafði ekki teflt kappskák í 15 ár, en náði samt vinningunum þremur og hálfum sem þurfti til, til að verða útnefndur kandídatameistari í skák (CM). Jón Trausti Harðarson hjá Skákdeild Fjölnis náði líka sama árangri. Jón hafði tekið sér talsvert hlé frá skákinni (þó ekki jafnlangt og Bogi) og kom nú merkilega ferskur til baka. Það var þó Ólafur Örn Ólafsson sem vakti mesta athygli, en hann fékk fjóra og hálfan vinning af sjö hjá Dímon. Ólafur er með rúm 1.700 stig og þarf að komast upp í 2.000 stig, til að geta krafist þess að fá CM titilinn. Alla jafna þarf 2.200 stig. Undirritaður tefldi titilskák í lokaumferðinni með svörtu, þar sem sigur hefði tryggt sama titil. Tilraunir hvíts til að þvinga fram jafntefli báru árangur að lokum þótt greinarhöfundur hafi staðið til sigurs um tíma. En það koma önnur tækifæri síðar!
Þess má geta að tveir keppendur á Evrópumóti taflfélaga komu sér frá Ródos og til Budva í Svartfjallalandi strax að loknu móti. Það eru þeir Ingvar Þór Jóhannesson, 4. borðs maður TR og formaður félagsins, og Adam Omarsson, fimmta borðs maður sama félags. Ingvar mætti þangað sem þjálfari á Evrópumóti ungmenna (ásamt Birni Ívari Karlssyni) en Adam sem keppandi í elsta flokki, undir 18 ára. Evrópumóti ungmenna verður gert betri skil í næsta skákþætti Bændablaðsins!
