Vetnisknúin skip í smíðum
Smíði er hafin á tveimur vetnis skipum á vegum Samskipa. Áætlað er að þeim verði hleypt af stokkunum og þau tekin í notkun á siglingaleiðum innan Evrópu eftir um tvö ár.
Vetnisskipin verða meðal hinna fyrstu sinnar tegundar í heiminum og boðberi nýrra tíma í útblásturslausum skipaflutningum, að sögn talsmanna Samskipa.
Um er að ræða tvö vetnisknúin flutningaskip sem sigla munu á skemmri siglingaleiðum í Evrópu. Gert er ráð fyrir að smíði skipanna taki tvö ár en að baki er fimm ára langt hönnunarferli. Hönnun skipanna er unnin í samstarfi við Naval Dynamics AS í Noregi.
Skipin verða 135 metra löng og búin 3,2 MW vetnisefnarafal og dísilvél til vara. Þau geta hvort um sig borið 500 gámaeiningar (TEU). Samskip segja þetta fyrstu skip heims í þessum stærðarflokki.
Fyrsta stálið í skipin var skorið hjá Cochin-skipasmíðastöðinni í Kochi á Indlandi fyrir skemmstu.
Stefnt að kolefnishlutleysi fyrir árið 2040
„Sjálfbærni er samofin kjarnastefnu Samskipa sem hefur markmið sín í þeim efnum að leiðarljósi hvarvetna í starfseminni,“ segir Ágústa Hrund Steinarsdóttir, forstöðumaður markaðs- og samskiptadeildar Samskipa.
Með smíði Seashuttle-flutningaskipanna færi Samskip sig í átt að útblásturlausum skipaflutningum, en fyrirtækið hafi sett markið á kolefnishlutleysi fyrir árið 2040. „Samskip hófu þessa vegferð með skipum sem ganga fyrir jarðgasi, eða LNG. Á lengri siglingaleiðum, eins og til Íslands, ætla Samskip líka að vera í fararbroddi og stefna að upptöku nýjustu og bestu tækni um leið og hægt er,“ segir Ágústa.
Samskip tóku árið 2017 við rekstri skipanna Kvitnos og Kvitbjørn sem brenna fljótandi jarðgasi. Skipin voru smíðuð 2015. Skipin losa ekki köfnunarefnisoxíð, lágmarka brennisteinsdíoxíð og eru sögð losa um 70 prósent minni koltvísýring á hvert flutt tonn.
Are Gråthen, sem fer fyrir starfsemi Samskipa í Svíþjóð og Noregi og hefur haldið utan um SeaShuttle-vetnisskipaverkefnið, hefur sagt skipin ekki verða alsjálfvirk, því tæknin sé ekki komin þangað, hvorki hvað varðar sjálfkeyrandi skip né bíla, en þau verði þó gerð tilbúin undir sjálfvirkni.
Sigla milli Noregs og Hollands
Vetnisknúnu flutningaskipin munu flytja vörur milli Noregs og Hollands, um 700 sjómílna leið, og verða meðal fyrstu gámaflutningaskipa heims á skemmri flutningsleiðum sem ganga á grænu vetni án mengandi útblásturs, að sögn fyrirtækisins. Áætlað sé að með notkun vetnisins sparist hjá hvoru skipi útblástur sem nemi um 25.000 tonnum CO2. Þá verði skipin útblásturslaus í viðkomuhöfn með notkun grænnar landorku.
Smíði skipanna er hluti af brautryðjendaverkefninu Seashuttle, unnið í samstarfi við græna fjármögnunaráætlun norskra stjórnvalda sem miðar að útblásturslausum flutningum með notkun nýrra sjálfbærra tæknilausna.
