Til alls líklegir

Það heyrir til tíðinda að tveir hestar í 16 hesta keppnisliði Íslands komi úr ranni sama ræktunarbús. Hjónin Vignir Sigurðsson og Jónína Garðarsdóttir eru þó engir stórræktendur. Bæði sinna þau störfum utan heimilis en stunda hrossarækt og hestamennsku meðfram því á jörðinni Litlu-Brekku í Eyjafirði. 

 

Ræktunin á Litlu-Brekku hefur þó getið sér gott orð fyrir að gefa af sér góð keppnishross og nú eru tveir hestar þaðan meðal fremstu keppnishrossa landsins og munu keppa sem fulltrúar Íslands á heimsmeistaramótinu sem fram fer í Oirschot í Hollandi dagana 7.-13. ágúst.

 

Tveir öflugir

 

Reynir Örn Pálmason teflir fram Spóa frá Litlu-Brekku í fimmgangi, slaktaumatölti og skeiðgreinum og Gústaf Ásgeir Hinriksson kemur fram á stóðhestinum Pistli frá Litlu-Brekku í tölti- og fjórgangskeppni ungmenna. 

 

Vignir ætlar að fylgja liðinu eftir til Hollands og fylgjast með þessum félögum sínum gera atlögu að heimsmeistaratitlum. Sjálfur þjálfaði hann báða þessa hesta og kom fram með þá á sínum fyrstu mótum. 

 

Ólíkir hestar

 

Pistill hefur verið í eigu fjölskyldunnar að Árbakka síðan 2014. Hann er 10 vetra undan Mola frá Skriðu og Prinsessu frá Litla-Dunhaga I sem er dóttir Baldurs frá Bakka.

 

Gústaf Ásgeir og Pistill á brautinni í Hollandi í gær.     Mynd/Jacco Sujkerbujk

 

„Pistill er velheppnuð blanda af Mola og Baldri. Hann var rosalega skemmtilegur foli, þægur og ganggóður hestur.  Hann sýndi alltaf mikinn myndarskap sem folald og lét mikið yfir sér. Pistill og Spói eru ólíkir á þann hátt. Spói var rólegur og gangsamur en óx svo jafnt og þétt með tamningunni.“

 

Spói er 12 vetra gamall alhliða­gæðingur undan Ofsa frá Brún, bróður Óðs frá Brún, og Syrpu frá Ytri-Hofdölum.

 

„Spói kom hægt og bítandi en ég fór að keppa á honum sex vetra gömlum. Á níunda vetri kaupir Sigurbjörn Bárðason hann og þeir hafa átt farsælan keppnisferil,“ segir Vignir en Spói er nú í eigu Margrétarhofs ehf.

 

Reynir Örn Pálmason teflir fram Spóa frá Litlu-Brekku í fimmgangi, slaktaumatölti og skeiðgreinum. Hér eru þeir félagar á æfingu áður en þeir héldu út. Mynd/ /Margrétarhof

 

Lentu í góðum höndum

 

Aðspurður segir Vignir erfitt að selja frá sér gæðinga á borð við þá Pistil og Spóa. Hins vegar sé það raunarbót að sjá þeim vegna vel. 

 

Það er það sem maður óskar sér að þeir haldi áfram að vaxa. Það hafa þessir tveir gert enda lentu þeir báðir í frábærum höndum. Þeim hefur verið fylgt vel eftir og eru vandlega þjálfaðir og sýndir. Þeir hafa vaxið frá því ég lét þá frá mér sem er alveg frábært. Auðvita sér maður eftir svo góðum hestum sérstaklega þegar maður hefur lagt mikla vinnu í þá, en það er víst gangur lífsins.“

 

Vignir segist óneitanlega hlakka mikið til að fylgjast með hestunum í Hollandi. „Ég vona að þeim gangi rosalega vel. Ég held að þeir séu báðir til alls líklegir,“ segir Vignir.