Vinsamlegast athugið að þetta efni er eldra en 6 ára.
Hlutverk Umhverfisbankans verður að draga saman þekkingu á umhverfismálum á einn stað og beita m.a. myndbands­tækninni til að ná til yngri kynslóða.
Hlutverk Umhverfisbankans verður að draga saman þekkingu á umhverfismálum á einn stað og beita m.a. myndbands­tækninni til að ná til yngri kynslóða.
Mynd / Ásgeir Þórisson
Fréttir 27. mars 2018

Stutt myndbönd studd ítarefni munu einkenna Umhverfisbankann

Höfundur: HKr.
Framtíð lands og þjóðar – og heimsins alls – veltur á aukinni þekkingu fólks á umhverfismálum og raunhæfum aðgerðum á sviði umhverfismála. Það þarf að stórauka fræðslu í umhverfismálum og þá ekki síst í framhalds­skólum og byggja á myndrænni fræðslu. 
 
Undanfarnar vikur hefur Land­græðslan haft forgöngu um að leita eftir samstarfi ýmissa aðila í því skyni að stofna nýstárlegan gagnabanka sem nefndur hefur verið Umhverfisbankinn. 
 
Hugmyndin að gagnabankanum kviknaði á Umhverfisþingi í Hörpunni. Í hópi frummælenda voru tvær stúlkur úr Menntaskólanum við Hamrahlíð. Þær sögðu einfaldlega að of lítið væri til af kennsluefni í umhverfisfræðum í framhaldsskólum. Stúlkurnar báðu um að ungt fólk væri frætt um umhverfismál en dregið úr hræðsluáróðri.
 
Góðar undirtektir en fjármagn skortir
 
„Við höfum hitt ótal aðila og kynnt þeim hugmyndafræðina að baki Umhverfisbankanum. Við viljum fá sem flesta að borðinu og að stjórn bankans verði í höndum þeirra sem leggja til efni,“ sagði Áskell Þórisson, sem starfar á sviði kynninga og fræðslu hjá Landgræðslunni.
 
„Sem dæmi má nefna að við höfum rætt við Veðurstofuna, Hafrannsóknastofnun, Náttúru­fræðistofnun, Menntamála­stofnun, Landbúnaðarháskólann, Umhverfisstofnun, Landvernd, Skógræktina, Félag ungra umhverfissinna, Samlíf, Félag kennara í raungreinum og Matís. Undirtektir hafa verið ágætar en það skortir fjármuni svo hægt sé að ýta verkefninu úr vör. Hjá þessum aðilum starfa margir af okkar bestu vísindamönum á sviði umhverfisfræða og við erum þess fullviss að með þeirra aðstoð er hægt að útvega skólakerfinu gríðarlegt magn lifandi fróðleiks sem nemendur kunna að meta og tileinka sér. Í huga okkar Landgræðslumanna skiptir litlu hvar gagnabankinn verður vistaður. 
 
Aðalatriðið er samvinna og markmiðið er betur upplýstir nemendur. Þekking, byggð á vísindalegum staðreyndum, er eitt af því fáa sem getur komið okkur til bjargar í þeim vanda sem við blasir.“
 
Sami vísindamaður í mörgum skólum á sama andartaki
 
Áskell sagði að hlutverk bankans væri að draga saman þekkingu á umhverfismálum á einn stað og beita m.a. myndbandstækninni til að ná til yngri kynslóða. 
 
„Hugmyndafræðin gengur m.a. út á það að fá vísindamenn landsins til að fjalla í örstuttu máli um einstök mál sem tengjast þeirra sérsviði – og tengja svo ítarefni við allt saman. Sami loftslagsfræðingurinn gæti þannig verið að ávarpa nemendur í nokkrum skólum samtímis einn og sama morguninn. Þetta efni gætu kennarar líka nýtt í hópaverkefni. Við höfum rætt um að fá stuttar myndir frá stofnunum á borð við FAO og þýða yfir á íslensku. Markhópurinn er ekki einungis kennarar og nemendur. Allir landsmenn geta nýtt sér bankann.“
 
Viðskiptavinirnir verða að geta treyst bankanum
 
En banki er ekki banki nema viðskiptavinir hans geti lagt inn efni. Áskell sagði að ætlunin væri að hafa starfandi ritnefnd sem tryggði að fólk gæti treyst því efni sem er í Umhverfisbankanum. Farið yrði yfir allt efni, hvaðan sem það kæmi, og kannað hvort það styddist við bestu fáanlega þekkingu. 
 
„Þegar svona gagnabankar eiga í hlut skiptir öllu að viðskiptavinirnir geti treyst þeim. Við viljum ekkert bankahrun í þessum geira.“ 
 
Þegar gagnabankinn verður að veruleika mun einnig verða boðið upp á ljósmyndasafn sem fólk má nota að vild.
 
Litlir fróðleikslækir verða að straumhörðu fljóti
 
 
Það er alveg ljóst að stofn- og síðar rekstarkostnaður Umhverfisbankans mun kosta umtalsvert fé. 
 
„Við verðum að vinna saman í þessu máli. Við verðum að veita saman lækjum fróðleiks og þekkingar og búa til straumhart fljót þekkingar. Við verðum að nota þá tækni sem yngri kynslóðir þekkja; tala á því máli sem unga fólkið skilur. Samanlagður stofn- og rekstrarkostnaður bankans í nokkur ár nemur vissulega einhverjum milljónum – en það verður eins og og dropi í hafið miðað við ávinninginn,“ sagði Áskell að lokum.
Fyrsti umplöntunarróbóti landsins
Fréttir 19. apríl 2024

Fyrsti umplöntunarróbóti landsins

Í maí í fyrra var settur upp umplöntunarróbóti á gróðrarstöðinni Sólskógum í Kja...

Ólöglegur frágangur á dýrahræjum
Fréttir 19. apríl 2024

Ólöglegur frágangur á dýrahræjum

Opinn gámur, yfirfullur af dýrahræjum, stóð á dögunum á steyptu bílastæði við in...

Verslunarrekstur í dreifbýli er samfélagsverkefni
Fréttir 18. apríl 2024

Verslunarrekstur í dreifbýli er samfélagsverkefni

Vegamót á Bíldudal er matvöruverslun og veitingastaður. Gísli Ægir Ágústsson, ve...

„Allt of fáar messur“
Fréttir 18. apríl 2024

„Allt of fáar messur“

Tryggvi Sveinn Eyjólfsson, sem er á sautjánda aldursári, hefur vakið athygli fyr...

Íslenskar sængur um allan heim
Fréttir 18. apríl 2024

Íslenskar sængur um allan heim

Íslenskur dúnn ehf. selur æðardúnsængur beint til viðskiptavina um heim allan. Þ...

Vörðust ásælni ríkisins í jarðareign
Fréttir 17. apríl 2024

Vörðust ásælni ríkisins í jarðareign

Kristín Lárusdóttir og Guðbrandur Magnússon, bændur að Syðri- Fljótum í Meðallan...

Breyttar reglur um flutning líflamba
Fréttir 17. apríl 2024

Breyttar reglur um flutning líflamba

Verklagsreglur hafa verið endurskoðaðar um flutning á lömbum með verndandi eða m...

Gýgjarhólskot ræktunarbú ársins
Fréttir 16. apríl 2024

Gýgjarhólskot ræktunarbú ársins

Á fagfundi sauðfjárræktarinnar sem haldinn var á dögunum var Gýgjarhólskot í Bis...