Skoða bryggju austan við Vík
Fyrirtækið EP Power Minerals Iceland ehf. hyggst gera bryggju við Alviðruhamra á austanverðum Mýrdalssandi. Matsáætlun framkvæmdaaðila hefur verið lögð fyrir skipulagsstofnun.
Bryggjan er hugsuð til flutnings á efni úr námum á Háöldu við Hafursey. Viðlegukanturinn á að geta tekið á móti skipum sem eru stærri en 1.350 tonn. Gert er ráð fyrir mjórri rörabryggju sem nær tvo kílómetra út í sjó og 200 metra viðlegukanti við enda hennar. Utan við bryggjuna þyrfti að gera eins kílómetra langan varnargarð til að skýla fyrir öldugangi, enda svæðið fyrir opnu hafi. Áætluð efnistaka á Mýrdalssandi er 146 milljónir rúmmetrar og mun það nýtast við sementframleiðslu á meginlandi Evrópu. Fyrri áætlanir miðuðu að því að flytja efnið landleiðina að höfninni í Þorlákshöfn, en mættu þær mikilli andstöðu. Alviðruhamar er tólf kílómetra vestan við ósa Kúðafljóts og suðvestan við Álftaver. Í skýrslu framkvæmdaaðila kemur fram að það sé einn af fáum stöðum við suðurströndina þar sem fast berg nær nánast alla leið til sjávar. Framkvæmdaaðilar segja tvo kosti koma til greina við að flytja efnið frá námunni að bryggjunni. Annað hvort verður að flytja það með færibandi yfir sandinn eða með vörubílum á sextán kílómetra löngum vinnuvegi. Í báðum tilvikum þyrfti að gera göng undir þjóðveg 1.
Með stuttri flutningsleið og sérhannaðri bryggju er áætlað að útflutningur á efni geti verið allt að fimm milljónir tonna á ári sem þýðir að efni námunnar mun endast í þrjátíu ár. Fyrri áform um þjóðvegaflutning til Þorlákshafnar gáfu eingöngu færi á að flytja 500 þúsund tonn á ári. Opið er fyrir athugasemdir í skipulagsgátt til 16. apríl nk.
