Nýtt kort yfir skipan sauðfjárveikivarnarhólfa

Matvælastofnun hefur nú formlega gefið út nýtt kort yfir uppfærð sauðfjárveikivarnarhólf.

Á því eru nýjustu upplýsingar um fjölda, legu og stærð allra hólfa, en í sumar voru þrjár sauðfjárveikivarnarlínur lagðar niður og þar með fækkaði hólfum um þrjú. Línurnar sem voru lagðar niður eru Kollafjarðarlína, Vatnsneslína og Jökulsárlína.

Ítarlegt heilbrigðiseftirlit

Ráðherra hefur heimild til að leggja niður varnarlínu hafi farið fram ítarlegt heilbrigðiseftirlit á búfé á þeim varnarsvæðum sem að línunni liggja og að fenginni umsögn frá Matvælastofnun.

Við brotthvarf Kollafjarðarlínu verður til eitt Vestfjarðahólf í stað tveggja og þegar Vatnsneslína hverfur sameinast Vatnsneshólf annars vegar og Húna- og Skagahólf hins vegar í eitt Norðvesturlandshólf. Við niðurfellingu Jökulsárlínu verður til Norðurþings- og Múlahólf í stað Norðurausturhólfs og Héraðshólfs.

Sama sjúkdómastaða

Í mati Matvælastofnunar á Kollafjarðarlínu, sem nær úr Kollafirði í Ísafjarðarbotn segir að sama sjúkdómastaða sé beggja vegna línunnar. Girðingin hefur ekki fengið viðhald í áratugi og hefur legið niðri og skapað slysahættu í umhverfinu svo ákveðið hefur verið að taka hana upp. Athygli er vakin á því að þrátt fyrir sameiningu Vestfjarðahólfanna eystra og vestra, þá nær líflambasölusvæðið eingöngu yfir Vestfjarðahólf eystra. Sama sjúkdómastaða er einnig beggja vegna Vatnsneslínu, sem liggur úr Miðfjarðarvatni í Síðukrók við ósa Víðidalsár.

Jökuldalslína er í raun Jökla og Hálslón. Matvælastofnun segir sömu stöðu vera komna upp með Jöklu og var með Blöndu fyrir nokkrum árum, að hún er ekki lengur fjárheld. Sama sjúkdómastaða er beggja vegna árinnar, í Héraðshólfi og Norðausturhólfi sunnan Smjörfjallalínu.

Eyjafjarðará teiknuð inn á kortið

Sigurbjörg Bergsdóttir, sérgreinadýralæknir jórturdýra hjá Matvælastofnun, segir að til viðbótar nýrri hólfaskipan hafi verið gerðar lagfæringar á Eyjafjarðarlínu í kortagerðinni og hefur Eyjafjarðará verið teiknuð inn á kortið.

Það sé gert til þess að fyrirbyggja þann útbreidda misskilning að allir bæir austan Eyjafjarðarár séu í Eyjafjarðarhólfi. Reyndin er að stór hluti þeirra er í Tröllaskagahólfi, Eyjafjarðarlína fylgir ánni Mjaðmá og skilin milli hólfanna eru á milli bæjanna Rifkelsstaða og Munkaþverár.