Vinsamlegast athugið að þetta efni er eldra en 5 ára.
Sigurgeir Hreinsson, framkvæmdastjóri Búnaðarsambands Eyjafjarðar.
Sigurgeir Hreinsson, framkvæmdastjóri Búnaðarsambands Eyjafjarðar.
Fréttir 22. september 2017

Nýjar fjósbyggingar eða breytingar á eldri húsum á yfir 20 bæjum

„Framkvæmdagleðin er vissulega mikil, mér telst svo til að framkvæmdir standi yfir við alls 22 nýjar byggingar víðs vegar um Eyjafjörð, þar er um að ræða að verið er að byggja alveg ný fjós, stækka þau sem eldri eru og eða gera aðrar breytingar á húsakosti til að bæta aðbúnað,“ segir Sigurgeir Hreinsson, framkvæmdastjóri Búnaðarsambands Eyjafjarðar.
 
Hann hefur grannt fylgst með gangi mála á svæðinu. „Bændur eru að vinna í sínum málum og gera það á misjöfnum hraða, sumir fara sér hægt og taka eitt skref í einu, aðrir reisa heilu húsin á mettíma.“
 
Svarfdælskir bændur standa í ströngu
 
Vakið hefur athygli að í Svarfaðardal hafa nú í sumar staðið yfir framkvæmdir á 6 bæjum þar sem umtalsverðar breytingar hafa verið gerðar á eldri húsakosti þar sem mjólkurframleiðsla er stunduð og eða að byggð eru ný fjós. 
 
Nýir mjaltaþjónar hafa verið eða verða teknir í notkun í kjölfar framkvæmda. Svarfdælskir kúa­bændur hafa valið sér fjórar tegundir af mjaltaþjónum. Í fyrrasumar og sumarið þar áður hafa bændur á nokkrum bæjum til viðbótar verið með álíka framkvæmdir á sínum bæjum. Þegar upp verður staðið og framkvæmdum lokið eru harla fáir bæir þar sem mjólkurframleiðsla er stunduð þar sem ekki verður búið að gera heilmikla bragarbót og breytingar á húsakosti.
 
Nýtt fjós er um þessar mundir í byggingu á Göngustöðum, á Hofsá hefur allt innvols verið rifið innan úr fjósi og hlöðu og verið að byggja upp á nýtt. Viðbygging er að rísa við Sökku þar sem verða legubásar fyrir kýr og eldra fjósi verður breytt fyrir gjafaaðstöðu með plássi fyrir mjaltaþjón. Á Melum er nýlegt fjós og unnið að því að innrétta hlöðu til viðbótar hinu nýja fjósi. Á Búrfelli standa svo yfir framkvæmdir við byggingu nýs fjóss og talsverð viðbygging er að rísa við Hól á Upsaströnd, skammt norðan Dalvíkur.  
 
Nýbyggingar og eða breytingar
 
Sigurgeir nefnir að víðar en í Svarfaðardal séu menn í framkvæmdahug. Þannig er unnið að umtalsverðri stækkun á fjósi við Höfða í Grýtubakkahreppi og á Nesi í sömu sveit er risin nýbygging til uppeldis. Þá standa yfir framkvæmdir og lagfæringar á byggingum í Sveinbjarnargerði og umtalsverðar endurbætur inn í fjós á Dálksstöðum í Svalbarðsstrandarhreppi. 
 
Í Eyjafjarðarsveit er verið að bæta við uppeldisaðstöðu í Garði og Staðarhóli, í Klauf standa yfir framkvæmdir við umtalsverða viðbót á aðstöðu í hlöðu, nýjar innréttingar verða settar upp á Kambi, á Stóra-Hamri er einnig verið að breyta og stækka uppeldisaðstöðu. Viðbygging sem m.a. mun hýsa mjaltaþjón er að rísa á Akri, nýtt fjós er í byggingu á Stekkjarflötum og við Gullbrekku standa yfir breytingar á hlöðu og bætt verður við aðstöðu fyrir gripi.
 
Þá má nefna að verið er að breyta hlöðu og bæta við aðstöðu fyrir gripi á Hlöðum í Hörgársveit, nýtt fjós er í byggingu á Syðri-Bægisá í sömu sveit og bændur á Auðnum hafa keypt Bakka og standa þar miklar endurbætur yfir. Loks má nefna að á Öxnhóli er verið að breyta hlöðu fyrir kýr og gera lagfæringar á fjósi.
 
Framkvæmdastyrkir standa til boða
 
Sigurgeir segir að vissulega hafi nýr búvörusamningur frá því í fyrra blásið bændum eldmóð í brjóst en í honum stóðu þeim framkvæmdastyrkir til boða. Greidd eru framlög vegna nýframkvæmda og endurbóta á eldri byggingum er varða umhverfi, aðbúnað og velferð gripa. 
 
„Annað atriði sem hvetur bændur mjög áfram í þessum efnum er aðbúnaðarreglugerð fyrir nautgripi þar sem fram koma lágmarkskröfur um ýmis atriði svo velferð dýranna verði sem best tryggð, heilbrigði þeirra og góð meðferð. Margir bændur hafa getað brugðist við með tiltölulega litlum framkvæmdum en aðrir þurfa að leggja út í mikinn tilkostnað svo þeim verði kleift að halda áfram sínum búskap og uppfylla reglugerðina. Nokkuð margir tóku þann pól í hæðina að ganga alla leið, fara út í alvöru framkvæmdir og byggja upp á nýtt, búa sér til eins fína og góða aðstöðu fyrir sinn búskap og kostur er,“ segir Sigurgeir.
 
80% kúa á legubásum
 
Eftir að bændur á þeim bæjum sem áður eru taldir hafa lokið sínum byggingaframkvæmdum segir Sigurgeir að um 80% allra kúa í héraði séu nú á legubásum. 
 
„Það er greinilegt að bændur eru verulega að spýta í lófana og þeir sýna mikinn metnað, að vissu leyti má segja að um val hafi verið að ræða, það er að drífa sig áfram eða bara að hætta mjólkurframleiðslu. Greinilega eru margir sem völdu að halda sér innan greinarinnar áfram og eru nú að byggja upp af miklum myndarskap,“ segir Sigurgeir. Hann bendir á að ekki sé endilega um hreina aukningu á framleiðslu mjólkur að ræða í héraði, þó svo að flestir bændur sem í framkvæmdum standa um þessar mundir auki við sig. Á móti hafi mjólkurframleiðslu verið hætt á 9–10 bæjum á starfssvæði sambandsins á liðnu ári. 
Nýir pistlahöfundar
Fréttir 29. maí 2023

Nýir pistlahöfundar

Lesendur Bændablaðsins munu rekast á nýja pistlahöfunda í þessu tölublaði.

Arfgreining nautgripa gengur vel
Fréttir 29. maí 2023

Arfgreining nautgripa gengur vel

Búið er að lesa næstum 20 þúsund niðurstöður arfgreininga í gagnagrunn nautgripa...

Áskoranir og tækifæri
Fréttir 26. maí 2023

Áskoranir og tækifæri

Framtíð íslensks landbúnaðar – tækifæri og áskoranir var yfirskrift ársfundar La...

Geta endurnýtt eyrnamerki til ársins 2024
Fréttir 26. maí 2023

Geta endurnýtt eyrnamerki til ársins 2024

Matvælastofnun hefur áréttað að ekki sé heimilt að endurnýta eyrnamerki í eyru á...

LL42 ehf. fær stærstan hluta kinda- og geitakjöts
Fréttir 25. maí 2023

LL42 ehf. fær stærstan hluta kinda- og geitakjöts

LL42 ehf., sem er að fullu í eigu Stjörnugríss hf., fær langstærstan hluta af WT...

Tollkvótum útdeilt
Fréttir 25. maí 2023

Tollkvótum útdeilt

Tilkynnt var um samþykkt tilboð á tollkvótum fyrir innflutning af hinum ýmsu lan...

Vantar hvata til að halda áfram
Fréttir 25. maí 2023

Vantar hvata til að halda áfram

Bændur á bæjunum Bergsstöðum og Syðri-Urriðaá í Miðfirði standa nú í samningavið...

Nauðbeygður til að verjast
Fréttir 25. maí 2023

Nauðbeygður til að verjast

Bændur gætu verið í vanda telji þeir vindmyllur sem reisa á mögulega í nágrenni ...