Matvælastefna mótuð fyrir Ísland
Sjávarútvegs- - og landbúnaðarráðherra hefur sett á fót verkefnisstjórn sem hefur það hlutverk að móta matvælastefnu fyrir Ísland. Matvælastefnan skal liggja fyrir í árslok 2019.
Með matvælastefnunni skulu fylgja tillögur að aðgerðaáætlun til innleiðingar stefnunnar fyrir íslenskt atvinnulíf og stjórnkerfi.
Verkefnastjórnin er þannig skipuð:
- Vala Pálsdóttir, formaður, skipuð af ráðherra
- Ingi Björn Sigurðsson, skipaður af ráðherra
- Ragnheiður Héðinsdóttir tilnefnd af Samtökum iðnaðarins
- Anna Guðmundsdóttir, tilnefnd af Samtökum fyrirtækja í sjávarútvegi
- Sigurður Eyþórsson, tilnefndur af Bændasamtökum Íslands
Verkefnastjórar koma frá Matís og auk þess mun Matarauður Íslands eiga áheyrnarfulltrúa.
Í tilkynningu úr ráðuneytinu kemur fram að á Íslandi séu um margt kjöraðstæður til að framleiða úrvals matvörur - þökk sé hreinu vatni, jarðvegi og andrúmslofti. Þá sé lífríki hafsins ríkulegt, orkugjafar umhverfisvænir og hér sé dýrmæt matarhefð.
„Í stjórnarsáttmála ríkisstjórnarinnar er lögð áhersla á að Ísland skuli vera leiðandi í framleiðslu á heilnæmum landbúnaðarafurðum og tryggð verði áframhaldandi samkeppnishæfni sjávarútvegs á alþjóðlegum mörkuðum. Þá beri að nýta tækifæri sem byggjast á áhuga á matarmenningu með sjálfbærni og gæði að leiðarljósi, þróa á lífhagkerfið enn frekar og stuðla að nýsköpun og vöruþróun til að auka virði afurða og byggðafestu,“ segir í tilkynningunni.
Verkefnisstjórnin mun hafa eftirfarandi þætti að leiðarljósi við mótun matvælastefnunnar:
- Stuðla að sjálfbærri matvælaframleiðslu í gegnum virðiskeðjuna
- Bætt aðgengi að hollum matvælum með áherslu á lýðheilsu
- Nýsköpun, vöruþróun og virðissköpun í virðiskeðjunni
- Uppruna matvæla, merkingar og matvæla öryggi
- Aðgengi að upplýsingum og gegnsæi
- Mikilvægi þess að draga úr matarsóun
- Samkeppnishæfni á alþjóðlegum markaði
