Ljósmyndabókin Stafrófið í íslenskum blómum komin út
Ljósmyndabókin Stafrófið í íslenskum blómum er nýkomin út en hún er eftir Eddu Valborgu Sigurðardóttur hönnuð.
Að sögn Eddu er meginmarkmið bókarinnar að sy´na börnum á öllum aldri ljósmyndir af íslenskum blómum í náttúrulegu umhverfi, þannig að þau geti þekkt blómin aftur úti í náttúrunni.
Edda V. Sigurðardóttur hönnuður.
Á hverri opnu í bókinni er ljósmynd af íslensku blómi sem á við þann bókstaf í stafrófinu sem stendur efst í horni blaðsíðunnar. Þar er einnig stuttur texti; vísubrot eða þula þar sem viðkomandi blóm kemur við sögu, fróðleikur um hvar blómið er helst að finna og hvenær það blómstrar. Þegar grannt er skoðað má svo finna litla blómálfa sem fela sig inni á milli blómanna. Aftast í bókinni er opna með yfirliti yfir heiti blómanna á íslensku, ensku og latínu, ásamt stuttum texta á ensku um hvert blóm og um íslenska stafrófið.
Hin dásamlegu villtu blóm í íslenskri náttúru
Edda segir svo frá kveikjunni að bókinni: „Ung hafði ég gaman af umhverfi mínu og tók eftir því smáa. Ef til vill varð þessi áhugi og síðar hæfileiki til þess að ég fór í myndlistarnám og hef starfað sem teiknari og grafískur hönnuður í áratugi. Það er ómetanlegt að kunna að horfa og sjá – skilja form, liti, lögun hluta og mynstur. Með bókinni vil ég deila þessari upplifun og hafa áhrif á unga sem aldna til að njóta hins smáa í kringum okkur. Í þessari bók eru það hin dásamlegu villtu blóm í íslenskri náttúru.“
Höfundur gefur bókina sjálfur út, með styrkjum frá Náttúruverndarsjóði Pálma Jónssonar og Hvítlist.
