Lambakjötið vinsælasti íslenski maturinn meðal erlendra ferðamanna
Rúmlega 90% erlendra ferðamanna smökkuðu dæmigerðan íslenskan mat samkvæmt könnun sem Gallup gerði nýverið fyrir markaðsstofuna Icelandic Lamb.
Spurt var um lambakjöt, skyr, laxfiska, mjólk, þorsk, nautakjöt, ost, svínakjöt, harðfisk, hval, kæstan hákarl og folaldakjöt. Einungis 9,4% erlendu ferðamannanna höfðu ekki smakkað neitt af þessu. Ef hin 90,6% eru skoðuð kemur í ljós að 57,8% þeirra borðuðu lambakjöt á meðan þeir dvöldu hér á landi en 53,7% smökkuðu íslenska skyrið, sem er í öðru sæti.
Erlendir ferðamenn vilja íslenskan mat
Markaðsstofan Icelandic Lamb hóf starfsemi fyrir rúmu ári. Helsta verkefni hennar er að kynna íslenskt lambakjöt og aðrar sauðfjárafurðir fyrir erlendum ferðamönnum. Þetta er m.a. gert með öflugri markaðsherferð á samfélagsmiðlum og samstarfi við um 160 aðila í verslun, veitingarekstri, framleiðslu, nýsköpun og hönnun.
Árangurinn hefur verið framar björtustu vonum. Innanlandssala á lambakjöti hefur vaxið síðustu misseri og kannanir sýna að stór hluti þess vaxtar er vegna aukinnar neyslu erlendra ferðamanna.
„Þessar kannanir sem Gallup hefur gert fyrir okkur sýna án nokkurs vafa að erlendir ferðamenn vilja borða íslenskan mat og þó að íslenska lambakjötið sé vinsælast eru aðrar afurðir ekki langt undan,“ segir Svavar Halldórsson, framkvæmdastjóri Icelandic Lamb.
Lambakjötið skilar miklu í ríkissjóð
Kannanirnar sem Gallup gerði fyrir Icelandic Lamb sýna að 52%–58% erlendra ferðamanna borða lambakjöt á meðan þeir dveljast hér á landi. Samkvæmt tölum Ferðamálastofu komu um 2,2 milljónir erlendra ferðamanna til Íslands í fyrra. Þetta þýðir að meira en milljón útlendingar borða íslenskt lambakjöt hér á hverju ári. Icelandic Lamb hefur áætlað út frá könnunum og sölutölum að erlendir ferðamenn borði um 1,5 milljón skammta af íslensku lambakjöti árlega.
„Ef við miðum við að hver máltíð kosti um 3.000 krónur er hægt að reikna út að gjaldeyristekjurnar eru 4,5 milljarðar,“ segir Svavar. „Öll sú atvinna og verðmætasköpun sem verður til á leiðinni frá sveitabæjunum á veitingastaðina og í verslanirnar skilar líka dágóðum skatttekjum. Bara virðisaukaskatturinn af þessari matarsölu er metinn á hálfan milljarð.“
–Sjá nánar á bls. 4 og í sérblaði sem fylgir Bændablaðinu í dag.
