Gengur bæði fyrir metangasi og bensíni

Fyrir skömmu heyrði ég auglýstan nýjan Skoda sem væri með metanvél. Verðið sem uppgefið var í auglýsingunni vakti áhuga minn, en að fá fjölskyldubíl með metan og bensínvél á ekki nema 3,4 milljónir var eitthvað sem ég taldi mig verða að skoða betur. 

 

Ekkert mál var að fá að prófa bílinn og hafði ég hann til prufuaksturs í dagpart.

 

Tveir „bensínmælar“

 

Bíllinn sem ég prófaði heitir Skoda Octavia A7 (Ambition 1,4 TSI G-Tec) og er beinskiptur með 110 hestafla vél. Í þau skipti sem ég hef prófað bíla sem hægt er að keyra bæði á metangasi og bensíni hefur mér fundist heldur skemmtilegra að keyra á bensíninu því að mér hefur hingað til fundist meiri kraftur á bensíninu.

 

Á þessum Skoda gat ég ekki fundið neinn mun, en þess ber að geta að ég keyrði aðeins 10 kílómetra af 130 km á bensíni, en 120 km á metangasinu.  Samkvæmt upplýsingum um bílinn á maður að komast yfir 1300 km á báðum tönkunum án þess að fylla á. 

 

Að öllu leyti er ósköp svipað að keyra þennan bíl og aðra nema að keyra á metangasi er maður vissulega að menga minna og nota náttúruvænt eldsneyti. Eini munurinn er að í flestum metanbílum eru tveir eldsneytismælar (metan og bensín) í mælaborðinu hlið við hlið.

 

Mikið rými inni í bílnum bæði í fram- og aftursætum

 

Að sitja inni í bílnum er afar þægilegt, sama hvort setið er í framsætum eða í aftursætum. Sem dæmi þá voru um 20 sentímetrar frá hnjánum á mér í bílstjórabakið þegar ég settist í aftursætið miðað við að bílstjórasætið var stillt fyrir mig. Olnbogarými er ágætt fyrir þrjá fullorðna í aftursætunum. Í framsætunum er mjög gott fótapláss, en eitt var það sem vakti athygli mína.

 

Með poka fyrir rusl

 

það er í fyrsta sinn sem ég prófa bíl að ég tók eftir sérstöku hólfi sem ætlað er fyrir rusl og meira að segja var ruslapoki í bílnum sem ég prófaði.

 

Farangursrýmið er ekkert sérstaklega stórt, en mínusinn er að í metanbílnum er ekkert varadekk þar sem plássið sem að öllu jöfnu er fyrir varadekkið er notað fyrir metaneldsneytið og því er bíllinn bara með pumpu og kvoðu til að redda sér á næsta dekkjaverkstæði.

 

Góður á grófum vegi, en leiðinda titringur á þvottabrettum í lausamöl

 

Eins og áður segir var fínt að keyra bílinn, en ég tók sérstaklega eftir því hversu vélin var á lágum snúningi í sjötta gír og á 90 km hraða, en þá snérist vélin rétt innan við 2000 snúninga á mín. 

Ég prófaði bílinn á mjög lausum malarvegi sem byrjaði nánast holulaus með mikilli lausri möl á yfirborðinu.

 

Að keyra á lausri mölinni fannst mér leiðinda marr í bílnum og um leið og stýrinu var beygt kom skriðvörnin inn. Síðan versnaði vegurinn og varð holóttari og á stöku stað stóð grjót upp úr veginum. Við þessar vondu aðstæður var fjöðrunin að vinna vel og gott að keyra bílinn, skriðvörnin hætti að taka kraftinn af mér og alltaf varð ljúfara að keyra bílinn þrátt fyrir versnandi veg.

 

Frábært verð á nýjum metanbíl

 

Miðað við aðra metanbíla sem eru í boði er þessi nýi Skoda-bíll á einhverju hagstæðasta verði sem ég hef séð. Svo fá eigendur metanbíla víða frítt í bílastæði, borga nánast ekkert í bifreiðagjöld. Eini ókosturinn er hversu fáir afgreiðslustaðir eru fyrir áfyllingu á metangasi. 

 

Verðið á bílnum sem ég prófaði er 3.420.000, en persónulega held ég að ég mundi taka Octavia Combi sem er mun fjölskylduvænni bíll. Farangursrýmið ræður þar mestu, 610 lítrar í stað 460 lítra og kostar sá bíll 3.520.000. 

 

Allar nánari upplýsingar er hægt að nálgast á vefsíðu Heklu h/f á vefslóðinni www.hekla.is.