Fuglaflensufaraldur í uppsiglingu í Evrópu
Staðfest hefur verið af Matvælastofnun Danmerkur að nokkur tilfelli fuglaflensu af völdum H5N8 veirunnar hafi greinst í landinu. Talið er að sýkingin kunni að vera undanfari fuglaflensufaraldurs í Evrópu.
Fyrstu tilfelli í Danmörku greindust í þrjátíu öndum á býli á Sjálandi. Sýkingin hafði áður greinst í villtum fuglum í Danmörku og í kjölfarið er búið að banna alla lausagöngu alifugla í landinu.
Hækka viðbúnaðarstig
Frá því að upp komst um sýkinguna í Danmörku hafa yfirvöld í Þýskalandi fyrirskipað að tæplega 9000 gæsum verði slátrað vegna smits á fuglaalibúi í Schleswig-Holstein héraði. Fyrir nokkrum vikum var slátrað í sama héraði um 30.000 hænsnum vegna hættu á smiti eftir að sýking greindist í mávum í nágrenni við alifuglabú. Um svipað leyti var 300.000 eggjum í Þýskalandi sem ætluð voruð til áframeldis í Danmörku fargað í varúðarskyni.
Sænsk yfirvöld hafa hækkað viðbúnaðarstig í kjölfar fréttanna en talið er að sýkingin í Danmörku kunni að vera undanfari alvarlegs fuglaflensufaraldurs í Evrópu.
Ríkið dæmt til skaðabóta
Í ljósi þess að hugsanlega megi eiga von á fuglaflensufaraldri í nágrannalöndum okkar er áhugavert að Héraðsdómur Reykjavíkur hafi fyrir skömmu dæmt íslenska ríkið til að greiða fyrirtæki skaðabætur vegna hindrana á innflutningi á fersku kjöti.
Samtök verslunar og þjónustu hafa í tilkynningu fagnað niðurstöðu dómsins enda er það staðföst trú þeirra að núverandi innflutningsbann á fersku kjöti frá aðildarríkjum EES-samningsins gangi gegn ákvæðum samningsins og samningsskuldbindingum íslenska ríkisins.
Þess er krafist að innflutningur á fersku kjöti, sem er í samræmi við samevrópskar kröfur og undir eftirliti annarra EES-ríkja, verði heimilaður hér á landi í samræmi við EES-löggjöf.
EFTA dómstóllinn hafði áður dæmt að þessar hindranir samræmdust ekki EES-samningnum.
Björt Ólafsdóttir þingmaður Bjartrar framtíðar hefur lýst því yfir að Alþingi eigi að koma tafarlaust saman og aflétta öllum höftum á innflutningi á hráu kjöti til landsins.
Hræsni í rökum talsmanna um óheftan innflutning
Úrskurður héraðsdóms féll föstudaginn 18. nóvember, sama dag og Alþjóðaheilbrigðismálastofnunin helgaði aukinni vitund um sýklalyfjaónæmi.
Vilhjálmur Ari Arason, sérfræðingur í sýklalyfjanotkun barna og útbreiðslusýklaónæmra baktería, sagði í samtalið við Bændablaðið fyrr á þessu ári: „Að mínu mati felst mikil hræsni í því þegar menn tala á móti þeim aðferðum sem við höfum til að halda hættu á sýkingum vegna sýklalyfjaónæmra baktería niðri og vísa í máli sínu til hags neytenda.
Talsmenn óhefts innflutnings á kjöti tala vísindin óhikað niður og tala einnig niður til heilbrigðisstafsfólks sem glöggt þekkja til málsins. Sumir nefna að við komust auðveldlega í snertingu við þessar bakteríur erlendis, sem er satt. En þar borðum við yfirleitt bakteríurnar og drepum þær þannig eða þvoum þær af okkur jafnóðum. Þótt vissulega sé hætta í einhverjum tilvikum á bakteríurnar berist með okkur eða erlendu ferðafólki til landsins.
Hrátt kjöt getur hins vegar borið mikið magn baktería á yfirborði sínu sem auðveldlega getur borist í líkamsflóruna okkar úr því.
Samkvæmt lýðheilsusjónarmiðum erum við að minnsta kosti að taka rosalega áhættu með því að flytja kjöt óhindrað til landsins. Kjöti sem gæti verið í allt að þriðjungi tilfella smitað af algengum sýklalyfjaónæmum bakteríustofnum eins og svokölluðum klasakokkum sem varla finnast ennþá hér á landi.“
