Fræðsla og vitundarvakning um umhverfismál

Ungir umhverfissinnar eru félagasamtök og vettvangur ungs fólks sem vill láta gott af sér leiða í umhverfismálum. Félagið var stofnað árið 2013 og telur rúmlega 640 meðlimi allt í kringum landið.

Hlutverk félagsins er að vera málsvari ungs fólks í umhverfismálum, hvetja til upplýstrar umræðu og standa vörð um rétt komandi kynslóða til jafns aðgangs að náttúruauðlindum.

Fjölbreytt málefnastarf

Pétur Halldórsson, líffræðingur og formaður samtakanna, segir að hjá félaginu starfi málefnanefndir um skólp og sorp, miðhálendið, sjávarmengun, auðlindanýtingu, friðlýst svæði, samgöngur, landgræðslu, matvælaframleiðslu, vatnsvernd, loftslagsmál, fiskeldi og alþjóðasamstarf.

„Undir félagið falla einnig tvær landshlutanefndir, á Suðurlandi og Austurlandi, sem vinna að svæðisbundnum málefnum. Í gegnum slíkt málefnastarf verður til sérfræðiþekking ungs fólks með mismunandi reynslu og sýn á umhverfismál. Slík reynsla og þekking er nauðsynleg til að félagið geti tekið upplýsta afstöðu þegar kemur að því að hafa áhrif á ákvarðanatöku og stefnumótun stjórnvalda í skipulagsgerð og við mat á umhverfisáhrifum framkvæmda.“

Fræðsla

„Eitt af helstu verkefnum samtakanna er að stuðla að fræðslu og vitundarvakningu ungmenna með framhaldsskólakynningum á landsvísu.

Kynningarnar varpa ljósi á hvernig umhverfismál snerta ungt fólk og hvernig það sjálft getur haft áhrif á ákvarðanir stjórnvalda og daglegt líf. Frá október 2016 hafa 25 framhaldsskólar af 30 verið heimsóttir.
Stefnt er að því að heimsækja hina fimm fyrir lok vetrarins og í framhaldinu að heimsækja alla framhaldsskóla landsins árlega.

Kynningarnar eru því lausnamiðuð fræðsla um umhverfismál, líkt og kallað var eftir á X. umhverfisþingi umhverfis- og auðlindaráðuneytisins 2017,“ segir Pétur.

Vitund ungmenna um skipulagsmál   

Að sögn Péturs vinna samtökin að rannsókn sem er styrkt af Skipulagsstofnun um vitund ungmenna um skipulagsmál. „Rannsóknin felst í söfnun gagna og greiningu á svörum ungmenna á landsvísu um hversu meðvitað ungt fólk er um rétt sinn til að hafa áhrif á ákvarðanatöku stjórnar í skipulagsmálum.“

Alþjóðasamstarf

„Ungir umhverfissinnar eru m.a. í samvinnu við hóp ungs fólks í Alaska sem kallast Arctic Youth Ambassadors og er málsvari ungs fólks þar varðandi samfélags- og umhverfismál. Samvinnan er að hluta á vegum vinnuhóps Norðurskautsráðsins um líffræðilegan fjölbreytileika, Conservation of Arctic Flora and Fauna, og hefur einnig hlotið styrk frá bandaríska sendiráðinu á Íslandi.

Í kjölfar þessarar samvinnu kemur félagið nú að undirbúningi samráðsvettvangs ungmenna í umhverfis- og samfélagsmálum á norðurslóðum,“ segir Pétur.