Fleiri hross fara út

Alls voru 1.360 hross flutt frá Íslandi á árinu 2015. Reynast þau nokkuð fleiri en þau hross er fóru utan árlega á síðustu fimm árum. Hlutfall hrossa með fyrstu verðlaun í kynbótadómi hefur einnig hækkað.

 

Hrossin 1.360 fóru víða um heim og voru send til 18 landa, samkvæmt WorldFeng, upprunaættbók Íslenska hestsins. Líkt og fyrri ár fóru langflest hrossin til Þýskalands, 529 talsins, 219 hross fóru til Svíþjóðar og 165 til Danmerkur. 

 

Þá fóru 94 hross til Sviss, sem virðist vera stækkandi markaður, og 75 til Austurríkis sem er minni fjöldi en undanfarin ár. Noregsmarkaður hefur dregist jafnt og þétt saman en 59 hross fóru þangað árið 2015 sem  er töluvert lægra en á árunum 2005–2010 þegar yfir 100 hross fóru þangað á ári. Hins vegar virðast markaðir fyrir íslensk hross vera að glæðast í Finnlandi eftir nokkra lægð, 50 hross fóru þangað árið 2015 sem er mesti fjöldi sem sést hefur síðan 2009. 

 

Af minni mörkuðum sem glæddust á árinu má nefna að tíu hross fóru til Grænlands, tíu til Bretlands, 22 til Frakklands og 16 til Belgíu.  Alls yfirgáfu 233 stóðhestar landið, 661 hryssa og 466 geldingar.

 

Gæðahross í nýjum heimkynnum

 

Af þeim hrossum sem yfirgáfu Ísland höfðu 111 hross hlotið fyrstu verðlauna kynbótadóm. Þetta reynist vera 8,2% af útfluttum hrossum ársins og er hækkunin töluverð miðað við fyrri ár. Frá árunum 2005 til 2010 var hlutfallið undir 5%. Á árunum eftir það fór hlutfallið að hækka jafnt og þétt frá 5,5% árið 2011 í 6,5% árið 2014.

 

Hæst dæmda útflutta hross ársins er Glóðafeykir frá Halakoti sem hlaut 8,75 í aðaleinkunn. Hann fór til Frakklands. Af öðrum hátt dæmdum stóðhestum má nefna Blæ frá Miðsitju (ae. 8,64) sem fór til Danmerkur, Andvara frá Auðsholtshjáleigu (ae. 8,61) sem fór til Þýskalands, Þröst frá Hvammi (ae. 8,59) sem fór til Bandaríkjanna og Sleipnisbikarhafann frá Landsmóti 2014, Vilmund frá Feti (ae. 8,56), en hann fór til Þýskalands. 

 

Hæst dæmda útflutta hryssa ársins er Garún frá Árbæ en hún hlaut 8,62 í aðaleinkunn þegar hún sigraði flokk 6 vetra hryssa á Heimsleikum íslenska hestsins í Danmörku. Ný heimkynni hennar eru í Noregi.