Ekki gert upp við bændur með sama hætti og áður

Björn Víkingur Björnsson, framkvæmdastjóri Fjallalambs á Kópa­skeri, segir að engar ákvarðanir um verð fyrir sauðfjárafurðir hafi enn verið teknar hjá fyrirtækinu. „Ég get ekki nákvæmlega sagt fyrir um eins og mál standa nú hvernær við birtum verð en vaninn er að birta það í kringum miðjan ágúst,“ segir hann. Sláturtíð verður með álíka hætti hjá Fjallalambi og verið hefur undanfarin ár og hefst í byrjun september.

 

Björn Víkingur segir enn ekki komna endanlega niðurstöðu varðandi það hvernig fyrirtækið hyggist gera upp við bændur í komandi sláturtíð, „en það er alveg ljóst að ekki verður hægt að gera upp við bændur með sama hætti og verið hefur,“ segir hann.

 

Fjallalamb tekur afurðalán líkt og undanfarin ár. Birgðir eru meiri en var á sama tíma í fyrra, en framkvæmdastjórinn segir að um 100  tonnum meira sé nú til í birgðum hjá fyrirtækinu en var á sama tíma á síðasta ári.

 

Þurfum að taka á vandanum

 

Björn Víkingur segir að finna verði leiðir til þess að flytja út meira af kjöti á erlenda markaði. „Við þurfum nauðsynlega að taka á þessum vanda og það verður að gera sláturleyfishöfum kleift að selja lambakjöt erlendis án þess að þeir tapi á því,“ segir Björn Víkingur.

 

Varðandi kvartanir sem borið hefur á um að ekki sé ávallt nægt kjöt í boði í verslunum og menn hafa verið að ræða á samfélagsmiðlum segir hann að mjög erfitt geti verið að sjá fyrir sölu, t.d. á grillkjöti. Sú sala fari nánast algjörlega eftir veðri. „Við reynum að sjálfsögðu að hafa alltaf til nóg af öllum vörum,“ segir hann.