Eftirspurn eftir heyi erlendis frá
Ráðgjafarmiðstöð landbúnaðarins hefur beint þeim skilaboðum til bænda að hugsanlega verði eftirspurn eftir heyi í haust, bæði hérlendis og erlendis frá. Þetta kemur fram í frétt á vef RLM.
Tengiliður bænda í Suður-Noregi hefur haft samband við RML og óskar eftir öllu því heyi sem íslenskir bændur kunna að hafa til sölu. Bændablaðið hefur heimildir fyrir að fyrirspurn hafi komið til heysala hérlendis frá Norðurlöndunum hvort hægt væri að útvega þúsundir tonna af graskögglum. Óvenjumiklir þurrkar í Skandinavíu það sem af er sumri hafa leitt til minni uppskeru en síðustu ár og því er þörfin aðkallandi.
Ráðgjafarmiðstöðin hvetur þá bændur sem hafa áhuga á að kynna sér málin nánar að hafa samband við Guðfinnu Hörpu Árnadóttur ráðunaut með tölvupósti á netfangið gha@rml.is eða í síma 516-5017.