Dekkjahliðar fluttar inn

Þrátt fyrir að mikið falli til af vörubíladekkjum á Íslandi svarar ekki kostnaði að framleiða dekkjahliðar innanlands.

Við votheysverkun á heyi í útistæðum þurfa bændur að leggja farg ofan á stæðuplastið, bæði til að koma í veg fyrir að það fjúki og að minnka pláss fyrir súrefni. Algengt er að nota svokallaðar dekkjahliðar, sem eru búnar til úr gömlum vörubílsdekkjum. Þegar dekkin hafa verið skorin á þennan hátt eru þau bæði þægilegri í meðförum og skapast minni hætta á að stálþræðir úr sólanum geri agnarsmá göt á plastið.

Nokkra athygli vakti þegar Finnbogi Magnússon, sem selur búvélar og tæki, auglýsti á Facebook að hann hefði hafið innflutning á dekkjahliðum erlendis frá. Þar kom fram að við kaup á einu búnti með 50 hliðum kostaði hver hlið 540 krónur án virðisaukaskatts og að meðalþyngd á hverri hlið sé 13 kílógrömm. Skrifuðu margir athugasemdir þar sem þeir lýstu undrun sinni á því að ekki væri hægt að kaupa dekkjahliðar af innlendum aðilum, enda fellur til mikið af dekkjahliðum á Íslandi.

Guðmundur Árni Jónsson, sérfræðingur í endurvinnslu hjá Hringrás, kannast vel við notkun á dekkjahliðum sem farg á heystæður. Hann segir fyrirtækið hafa skorið hliðar af vörubíladekkjum til þess að selja bændum, en hafi hætt því þar sem það svaraði ekki kostnaði. Hringrás sendir dekk til endurvinnslu erlendis og fær rúmlega 80 króna úrvinnslugjald fyrir hvert kíló sem skilar sér í meiri afkomu. „Við fáum allt að tíu sinnum minna fyrir þetta ef við leggjum í vinnuna við að skera dekkin,“ segir Guðmundur. Hann bætir jafnframt við að þessi vara sé ekki seld í miklu magni og því borgi sig ekki fyrir fyrirtækið að koma sér upp tækjabúnaði sem geti gert þetta á hagstæðari hátt.

Fura er eitt þeirra fyrirtækja sem tekur við hjólbörðum til endurvinnslu. Samkvæmt svörum þaðan var skoðað fyrir þónokkrum árum að fara út í framleiðslu á dekkjahliðum, en ákveðið að gera það ekki.