Breskir bændur sitja á „lausafjártímasprengju“

Margir breskir bændur kvíða komandi vetri þar sem slæm lausafjárstaða gæti haft afgerandi áhrif á afkomu bænda og matvælafyrirtækin. Ástæðan er krafa verslunarinnar um verðlækkanir á afurðum 

Lord Curry, þingmaður, bóndi og lávarður af Kirkharle (Donald Thomas Younger Curry), segir að bændur í fjársvelti sitji nú þegar á tímasprengju vegna of lágs afurðaverðs og stöðugrar pressu um lægra verð.  

 

Man ekki verri stöðu

 

„Ég man ekki eftir því að afurðaverð hafi farið eins neðarlega og núna,“ sagði þessi 71 árs gamli bóndi í ræðu í veislu sem haldin var á uppskeruhátíð 125 landbúnaðarblaðamanna og gesta sem haldin var í London. Greint var frá þessu í Farmers Weekly í byrjun mánaðarins. Hann hefur rekið eigið bú í Northumberland. „Þetta mun hafa gríðarleg áhrif og ég er mjög áhyggjufullur.“

 

Hann segir að ef ekki hefði komið til góð uppskera, þá hefðu margir bændur þegar verið komnir í algjöra skelfingu. Mikil uppskera muni þó ekki duga til að halda mönnum á floti. 

 

Hanga á bjargbrúninni á nöglunum 

 

Hann segir að komandi vetur verði prófsteinn á hversu mörg af þeim landbúnaðarfyrirtækjum sem nú „hangi á nöglunum“ einum á bjargbrúninni komi til með að lifa af. 

 

Curry tók þó ekki djúpt í árinni hvað varðar gagnrýni á verslunina og aðra viðskiptavini bænda. Sagði hann það allt hluta af samfélagi bænda, í þeim hópi væru vinir og nágrannar. Bændur hefðu líka ábyrgð sem heild til að hjálpa þeim þegar þannig stæði á. 

 

Evrópusambandið hefur gefið einstökum aðildarríkjum heimild til að liðka fyrir og flýta útgreiðslum landbúnaðarstyrkja til að slá á vandræðin. Þá styrki átti ekki að byrja að greiða út fyrr en 1. desember en var heimilað að hefja útgreiðslur þann 16. október. Er þetta hluti af ráðstöfunum sem komið hafa fram í kjölfar gríðarlegra mótmæla evrópskra bænda að undanförnu vegna lágs afurðaverðs.