Bestu og flottustur hrútar landsins

„Nýja hrútaskráin rýkur út enda allir mjög spenntir að sjá hvaða hrúta við kynnum núna og verða á Sauðfjársæðingastöð Suðurlands og Vesturlands yfir fengitímann,“ segir Guðmundur Jóhannsson, ráðunautur og ritstjóri Hrútaskrárinnar 2014–2015, sem er nýlega komin út. 

 

Hann hefur verið ritstjóri í þau sautján ár, sem skráin hefur komið út. Í skránni eru upplýsingar um tæplega fimmtíu bestu hrúta landsins en um helmingur þeirra eru nýir á stöðvunum. Afgreiðsla á fersku svæði á báðum stöðunum hefst 1. desember. Sæðisskammturinn í eina á kostar 720 krónur. 

 

Forystuhrútur og ferhyrndur hrútur

 

Nú geta sauðfjár­bændur pantað sæði úr forystuhrútnum Ama frá Sigtúnum í Öxarfirði. „Ami er há- og grannvaxinn, reistur og léttbyggður svo sem forystufé ber að vera. Hann er stóreygður og hefur til að bera mikla árvekni, örar hreyfingar og ekki spillir höfðing­legt fasið og yfirbragðið.  Hann er þægur í rekstri og ljúfur við fólk en á það til að amast við öðru fé og dregur nafn sitt af því. Ami ku vera vanafastur með afbrigðum svo sem títt er um forustufé,“ segir í Hrútaskránni. Þá verður líka hægt að fá sæði úr ferhyrndum hrúti en sá heitir Höfði frá Mörtungu 2 á Síðu.  Höfði var fengin á stöðvarnar til að gefa fleiri bændum tækifæri til að eignast ferhyrndar kindur svo varðveita megi þennan eiginleika í sauðfjárstofninum en nokkur ár eru síðan slíkur hrútur var síðast á sæðingastöð.