Bændafundir BÍ um allt land í næstu viku

Forystufólk Bændasamtaka Íslands heldur til fundar við bændur nú í upphafi árs. Alls eru skipulagðir 18 almennir bændafundir víðs vegar um landið í næstu viku. Fundirnir hefjast á þriðjudaginn kemur. Fulltrúar Ráðgjafarmiðstöðvar landbúnaðarins verða með í för og ræða um framtíðarsýn og þróun ráðgjafarþjónustu. 

 

Að sögn Sindra Sigurgeirssonar, formanns BÍ, er af mörgu að taka. Rætt verður um stöðuna í landbúnaðinum og farið vítt yfir sviðið. Árið 2017 var fyrsta ár nýrra búvörusamninga og fyrir liggur fyrsta endurskoðun þeirra. Þá er nýlegur dómur EFTA-dómstólsins um innflutning á hráu kjöti og eggjum bændum umhugsunarefni og ljóst að því máli er hvergi nærri lokið. Sindri segir að viðfangsefni næstu missera verði áfram þau að bæta hag bænda og móta framtíðarsýn fyrir atvinnugreinina. Hann segir mikilvægt fyrir bændastéttina að standa saman og að rödd hennar hljómi sem víðast og sterkast. „Við verðum að gæta hagsmuna landbúnaðarins og þess vegna rekum við öflug Bændasamtök,“ segir Sindri í bréfi til félagsmanna sem birt er í nýju Bændablaði.

 

Hádegis- og kvöldfundir

 

Fundirnir hefjast í hádeginu kl. 12.00  þriðjudaginn 16. janúar með fundum á Ísafirði, Kópaskeri og Egilsstöðum. Á þriðjudagskvöld kl. 20.30 verða fundir í Kjós, Breiðamýri og Berufirði. Í hádeginu á miðvikudag 17. janúar verða fundir á Blönduósi, í Eyjafirði og í Hornafirði. Kvöldfundir á miðvikudag verða í Skagafirði, á Ströndum og á Kirkjubæjarklaustri. Í hádeginu á fimmtudag verða fundir á Snæfellsnesi, í Heimalandi og á Barðaströnd. Fundalotunni lýkur með kvöldfundum í Dölum, á Hvanneyri og í Þingborg í Flóa.

 

Allir félagsmenn í Bændasamtökum Íslands eru velkomnir á fundina.

 

Fundarstaður	Dagsetning		Tími	Svæði
Hótel Ísafjörður	16. janúar	þri.	12.00	Ísafjörður
Fjallalamb	16. janúar	þri.	12.00	Kópasker
Hótel Icelandair	16. janúar	þri.	12.00	Egilsstaðir
Ásgarður	16. janúar	þri.	20.30	Kjós
Breiðamýri	16. janúar	þri.	20.30	S-Þingeyjarsýsla
Karlsstaðir	16. janúar	þri.	20.30	Berufjörður
Félagsheimilið	17. janúar	mið.	12.00	Blönduós
Hlíðarbær	17. janúar	mið.	12.00	Eyjafjörður
Mánagarður	17. janúar	mið.	12.00	Hornafjörður
Langamýri	17. janúar	mið.	20.30	Skagafjörður
Sævangur	17. janúar	mið.	20.30	Strandir
Kirkjuhvoll	17. janúar	mið.	20.30	Kirkjubæjarklaustur
Breiðablik	18. janúar	fim.	12.00	Snæfellsnes
Heimaland	18. janúar	fim.	12.00	Rangárvallasýsla
Birkimelur	18. janúar	fim.	12.00	Barðaströnd
Dalabúð	18. janúar	fim.	20.30	Dalir
Matsalur LbhÍ	18. janúar	fim.	20.30	Hvanneyri