Axel vill halda formennsku áfram

Axel Sæland gefur kost á sér til áframhaldandi formennsku í garðyrkjudeild Bændasamtaka Íslands.

Kjör til stjórnar garðyrkjudeildar Bændasamtaka Íslands (BÍ) eru áformuð á deildarfundi Búnaðarþings 24. mars.

Axel varð formaður Sambands garðyrkjubænda árið 2021 áður en það sameinaðist nýju félagskerfi BÍ.

Hann tók við formennsku af Gunnari Þorgeirssyni, sem varð formaður BÍ, en Axel er þriðji ættliðurinn sem gegnir formennsku í hagsmunafélagi garðyrkjubænda.

Hann segist enn brenna fyrir málefnið og hagmunabaráttuna og á meðan svo sé langi hann til að bjóða fram sína starfskrafta. Honum finnst margt vera óunnið, til dæmis í samhengi við komandi búvörusamninga sem hann segist vilja fylgja alla leið.