Átak um öryggi barna í sundi
Rauði krossinn á Íslandi hefur hleypt af stokkunum fræðslu- og forvarnarátaki um öryggi barna í sundi. Átakið er unnið í samstarfi við Reykjavíkurborg og Samtök forstöðumanna sundstaða á Íslandi (SFSÍ) og nær það til alls landsins.
Hildur Vattnes Kristjánsdóttir, sérfræðingur í skyndihjálp hjá Rauða krossinum, fer fyrir átakinu. „Tilgangur átaksins er fyrst og fremst að bjarga lífum með því að fræða foreldra og aðra um mikilvægi þess að fylgjast alltaf með börnum í sundi og kringum vatn. Börn á aldrinum 1–9 ára eru í meiri hættu en við hin á að lenda í vandræðum í sundi og að drukkna. Þó svo að börn séu með kúta eða eru synd er ekkert sem kemur í staðinn fyrir eftirlit foreldra því að barn getur drukknað á 30 sekúndum. Reykjavíkurborg og SFSÍ fannst mikilvægt að fara í átak í öryggi barna í sundi þar sem reynslan er farin að sýna okkur að oft hefur ekki mátt miklu muna að börn hafi drukknað. Flestir njóta þess að fara í sund á sumrin svo besti tíminn fyrir að hefja forvarnarátakið er einmitt núna,“ segir Hildur.
Öryggi og björgun í vatni
Flestar drukknanir verða á stöðum þar sem engir aðilar sinna eftirliti. Laugaverðir sinna eftirliti í sundlaugum á Íslandi. Rauði krossinn hefur um nokkurt skeið kennt öryggi og björgun í vatni, námskeið sem eru sérstaklega sniðin að starfsfólki sund- og baðstaða.
Rauði krossinn ber einnig ábyrgð á hæfnismati laugavarða, sem þeir þurfa að standast árlega til að halda réttindum sínum. „Laugaverðir eru viðbragðsaðilar en það þýðir að þeir bregðast við um leið og eitthvað gerist. Erlendar rannsóknir sýna að í 9 af hverjum 10 tilvikum þar sem fólk er í vandræðum í vatni eru það gestir sundlauga sem fyrstir bregðast við. Það skýrist af því að þeir eru þá í návígi við þann sem er í hættu staddur,“ segir Hildur.
68 drukknanir á Íslandi á tíu árum
Hildur segir að á 10 ára tímabili, eða árin 2013 til 2023, hafi 68 manns drukknað á Íslandi. „Enginn á að drukkna, enginn. Drukknun er orðin að hinum þögla faraldri í heiminum í dag en við erum farin að taka eftir aukinni tíðni drukknunarslysa og nú þurfum við að bregðast við. Á þessum tíu árum eru það að meðaltali 7 einstaklingar á ári sem láta lífið í drukknunarslysum. Fæstu tilfellin eru í sundlaugum, eða sex, og ástæðan er að þar er lögbundnu eftirliti sinnt af laugarvörðum sem eru viðbragðsaðilar. Einnig vil ég benda á að staðan í dag er þannig að það er engin starfandi rannsóknarnefnd drukknunarslysa á Íslandi, en flest löndin í kringum okkur hafa brugðist við aukinni tíðni drukknunar með því að stofna slíkar nefndir,“ segir Hildur.
Allar nánari upplýsingar um átakið er að finna á heimasíðu Rauða krossins, www.raudikrossinn.is.
