Litla hryllingsbúðin
Leikfélag Hveragerðis er eitt fyrsta, nú með haustinu, að bjóða leikhúsunnendum að fá sér sæti, en ætlunin er að gleðja áhorfendur með söngleiknum heimsfræga, Litlu hryllingsbúðinni.
Prufur hófust strax í byrjun júní og var fljótlega skipað í hlutverkin. Unnu leikarar ötullega að því yfir sumarið að læra textann sinn og hófust æfingar á fullu í ágúst, enda gleði og tilhlökkun í mannskapnum.
Söngleikurinn Litla hryllingsbúðin, sem gerður var eftir samnefndri kvikmynd frá árinu 1960 (og svo aftur árið 1986) hefur verið margverðlaunaður og sýndur víða um heiminn. Gaman er að segja frá því að af söngleikjum sem sýndir hafa verið í hvað lengstan tíma samfellt var Litla hryllingsbúðin í þriðja sæti, en hann var m.a. sýndur í rúm 2.200 skipti í Orpheum leikhúsi New York- borgar frá árinu 1982.
Litla hryllingsbúðin fjallar um uppburðarlítinn ungan mann að nafni Baldur sem vinnur í blómabúð ásamt henni Auði sem honum finnst mjög sæt. Auður á þó kærasta, leðurklædda tannlækninn og sadistann sem nýtur þess að beita hana ofbeldi. Eins og þeir sem þekkja söguna, endar sá kauði í kjafti mannætublóms sem Baldur keypti óvart og áætlaði að selja í búðinni. Blómið sem Baldur nefndi Auði II vex og dafnar, en honum að óvörum hefur hún skyndilega upp mál sitt.
Hið innra eðli hennar kemur þá skjótt fram, en Baldri til skelfingar nærist Auður II helst á fersku mannakjöti ...
Mörg þekkt lög eru í söngleiknum og þekktustu lögin á Íslandi eru eflaust Þú verður tannlæknir og Gemmér (í þýðingu Megasar).
Hefjast sýningar Litlu hryllingsbúðarinnar í byrjun október og sýnt verður í Leikhúsinu í Hveragerði að Austurmörk 23. Miðaverðið er 3.900 krónur en miðasala á tix.is verður auglýst síðar.
