Ziggy Stardust

Sagan segir að á Ziggy Stardust tímabilinu hafi David Bowie lifað á kókaíni, rauðum paprikum – og mjólk. Mynstrið í peysunni vísar til skrautlegrar sviðspersónu Bowie, því fleiri litir því betra. Katrín Andrésdóttir hannaði þessa peysu fyrir Þingborgarlopann sem hún litar undir merkinu Slettuskjótt en auðvitað er hægt að nota annað, jafnvel nýta litríka afganga. Leyfið hugmyndafluginu að ráða.

Stærðir: S M L XL XXL
Yfirvídd: 93 100 107 121 128

Efni:

350-350-400-400-450 g Þingborgarlopi í aðallit.

5 dokkur af Slettuskjótt sem er litaður Þingborgarlopi, hver dokka er 50 g

Ef notaður er lopi frá Ístex verður að gæta að prjónfestu, ekki er sami grófleiki á honum og á Þingborgarlopanum.

Sokkaprjónar 4 og 5 mm

Hringprjónar 4 mm 40 og 80 cm langir

Hringprjónar 5 mm 40, 60 og 80 cm langir

Saumnál til að lykkja saman undir höndum og ganga frá endum.

Lesið uppskriftina yfir áður en hafist er handa við að prjóna.

Prjónfesta:

14 l og 23 umf í sléttu prjóni = 10 x 10 cm

Önnur prjónastærð getur hentað, allt eftir því hvort prjónað er fast eða laust, finnið það út með því að prjóna prufu. Best er að prjóna prufu í hring, skola úr henni og klippa hana svo í sundur og mæla. Þannig fæst sem réttust niðurstaða.

Prjónað er úr plötulopanum tvöföldum.

Stroff er perluprjón 1 slétt og 1 brugðin lykkja, eða eftir smekk hvers og eins.

Úrtaka á berustykki:

3 X á mynsturblaði = Takið 2 lykkjur í einu óprjónaðar fram af prjóninum, prjónið næstu lykkju, steypið óprjónuðu lykkjunum yfir báðum í einu. Með þessu móti verður lykkja tvö fremst.

Bolur:

Fitjið upp með aðallit, 130-140- 150-160-170 l á 80 sm 5 mm hringprjón og prjónið stroff í hring 6-8 sm. Skipt yfir á 5 mm 80 sm hringprjóninn. Prjónið bol og á honum eru þrjár einingar af mynstri. Í síðustu umferð á bol er í stærð M fækkað um 2 lykkjur, eina á hvorri hlið bols og í stærð L er bætt við 4 lykkjum jafnt yfir umferð. Þetta er til að lykkjufjöldi passi við mynstur þegar búið er að sameina bol og ermar, en talan 10 verður að ganga upp í lykkjufjöldann. Hægt er að lengja bol ef þarf með því að prjóna nokkrar umferðir í viðbót með aðallit áður en mynstur er prjónað. (Mælið viðkomandi og metið bolsídd.)

Ermar:

Fitjið upp 30-36-40-40-44 l á 4 mm sokkaprjónana, prjónið stroff í hring 6-8 sm. Skiptið yfir á 5 mm sokkaprjónana þegar stroffi er lokið og aukið strax um 2 lykkjur undir miðri ermi, (1 lykkja eftir fyrstu lykkju og 1 lykkju fyrir síðustu lykkju í umferð). Endurtakið útaukningu 8-8-8-9-9 sinnum upp ermi, með u.þ.b. 8 umf á milli, þar til 48-54-58-60-64 l eru á prjóninum. Skiptið yfir á stutta 5 mm hringprjóninn á u.þ.b. miðri ermi. Gott er að nota prjónamerki til að merkja þar sem aukið er út. Prjónið uns ermi mælist 44-52 sm. (Mælið viðkomandi og metið hve ermin á að vera löng)

Axlastykki:

Sameinið nú bol og ermar á 5 mm 80 sm langa hringprjóninn. Haldið áfram með mynstrið þegar bolur og ermar eru sameinuð, þegar einum lit er lokið tekur næsti alltaf strax við. Setjið 4-4-5-5-6 síðustu l og 5-5-5-5-6 fyrstu l á báðum ermum á prjónanælu. Setjið 9-9-10-10-12 af bol á prjónanælu þar sem umferð byrjar vinstra megin á bol. Prjónið fyrri ermina við bolinn 39-45-48- 50-52 l, prjónið næstu 56-60-67-70- 73 l af bol og setjið næstu 9-9-10- 10-12 l á prjónanælu. Prjónið seinni ermina við og gerið eins og með hana. Prjónið síðan 56-60-67-70-73 l af bol. Þá eiga að vera á prjóninum 190-210-230-240-250 lykkjur. Prj mynstur eftir teikningu. Notið styttri hringprjóna eftir því sem lykkjum fækkar. Þegar úrtökum er lokið eins og sýnt er á mynsturblaði, eiga að vera 76-84-92-96-100 lykkjur eftir. Í næstu umferðum er tekið úr til viðbótar 12-16-20-20-20 lykkjur með sömu aðferð of fyrr, tekið úr á 6-8-10-10-10 stöðum. Dreifið þessum úrtökum jafnt yfir prjóninn. = 64-68-72-76-80 lykkjur. Vídd á kraga er auðvitað smekkur hvers og eins og því allt eins hægt að fella meira af til viðbótar en hér er gefið upp. Þá er prjónaður kragi og skipt yfir á 4 mm 40 cm hringprjón, prjónnið 3-5 sm, eða eins og hverum og einum þykir best að hafa kragann, fellið laust af. Gangið vel frá öllum endum og lykkjið saman undir höndum.

Þvottur:

Þvoið flíkina í volgu vatni með góðri ullarsápu eða sjampói. Skolið vel og vindið svo í hálfa mínútu í þvottavél. Mikilvægt er að vélin fari strax að vinda, (þær eru misjafnar að þessu leyti) en sé ekki að veltast með flíkina fyrst, þá getur hún þófnað. Leggið peysuna á handklæði til þerris.