Teflt utanhúss

Í gamla daga var helsta firmamót Taflfélags Reykjavíkur haldið utanhúss, yfirleitt á Lækjartorgi. Keppendur skelltu sér í stóra svuntu, þar sem nafn fyrirtækisins og merki þess var framan á svuntunni. Þetta er aðeins lágstemmdara í dag, þar sem menn smella smá nælu á sig, merkta fyrirtækinu. Í seinni tíð hefur stundum verið teflt á Lækjartorgi, en um tíma hélt Skákakademía Reykjavíkur viðburði þar í tengingu við 17. júní og menningarnótt, einnig á Vitatorgi. Maður hefði ætlað að mótum af þessu tagi myndi fjölga, en með hverju árinu eykst skjól í borgarlandinu með meiri gróðri.

Það getur þó verið snúið að skipuleggja mót sem þessi, því veðurguðirnir þurfa helst að samþykkja mótahaldið. Nú er Borgarskákmótið haldið í sjálfu Ráðhúsinu, í kringum afmæli borgarinnar, og hefur það tekist nokkuð vel. Stundum er einfaldlega tekin ákvörðun á staðnum, eins og í Viðey, hvort hægt sé að tefla að einhverju leyti úti. Teflt er í Viðeyjarstofu á hverju sumri, og ef veðrið er einstaklega gott, þá er borðum líka skellt á stéttina fyrir utan. Í fyrra var hins vegar teflt í mikilli þoku. Þess má geta að mótið í ár verður sunnudaginn 19. júlí næstkomandi, hægt er að lesa meira um það á taflfelag.is.

Taflfélag Reykjavíkur heldur þrjú skákmót yfir sumarið í góðu samstarfi við Reykjavíkurborg, ásamt Viðeyjar- og Borgarskákmótinu er einnig haldið mót á Árbæjarsafni. Það verður í ár þann 30. ágúst. Ég minnist þess ekki að teflt hafi verið utanhúss í Árbænum heldur alltaf í Kornhúsinu svokallaða. Þó var á tímabili haldin lifandi útiskák á safninu þar sem menn klæddu sig upp sem taflmenn og léku listir sínar!

Einnig hélt Miðbæjarskák um nokkurra ára skeið skákmót á bökkum Laugardalslaugar sem vakti alltaf þónokkra athygli sundlaugargesta. Með þessum pistli vil ég hvetja uppátækjasama skákáhugamenn sem vilja halda skemmtileg sumarmót, að einfaldlega láta á það reyna. Sjálfur sótti ég sumarnámskeið Skákakademíunnar fyrir 15 árum eða svo, og reglulega voru haldin mót í kringum þessi námskeið, bæði innandyra og utan. Þetta er líka hin ágætasta leið að gera skákina sýnilega almenningi og miklu máli skiptir að hafa nokkur taflborð laus fyrir frjálsa taflmennsku, burt séð frá því móti sem er haldið!

Ef lesendur Bændablaðsins luma á áhugaverðum skákum geta þeir haft samband. 

Umsjón: Gauti Páll Jónsson,

gauti.pj[hjá]hotmail.com