Pop-up eldhús á Þingeyri

Sjónvarpskokkurinn, dagskrárgerðarmaðurinn og listamaðurinn Kristinn Guðmundsson, oft nefndur Kristinn soð, var með pop- up eldhús í gamalli vélaskemmu á Þingeyri í sumar.

Kristinn hefur framleitt nokkrar þáttaraðir þar sem hann eldar í óreiðueldhúsi. Þáttaröðin Soð í Dýrafirði var sýnd á RÚV síðastliðið haust og var þessi veitingasala óbeint framhald af því.

Kristinn fékk aðstöðu til þess að undirbúa matinn í Grunnskólanum á Þingeyri, en var svo með matarvagn fyrir utan vélaskemmuna til þess að leggja lokahönd á matreiðsluna.

„Aðstaðan í grunnskólanum var ágæt, nema útsýnið var ekkert nema brött brekka rétt fyrir utan gluggann – sem er kannski allt í lagi fyrir svona sveimhuga mann eins og mig,“ segir Kristinn.

Einföld framkvæmd og hráefni af svæðinu

Veitingasalan sjálf var í Skelinni, sem er gömul vélaskemma við Fjarðargötu 42 á Þingeyri. Samtals var opið í átta daga í lok júlí og voru viðtökurnar framar vonum, en mest voru 38 matargestir á einu kvöldi. Matseðillinn var nokkurn veginn sá sami allan tímann til þess að framkvæmdin væri sem einföldust þar sem Kristinn var einn í eldhúsinu. „Einhvern tímann var ég með kindakjöt í kássunni í staðinn fyrir nautakjöt, sem var æðislega gott. Sósan í kássunni er frekar sæt og það passar fullkomlega með svona ærkjöti,“ segir Kristinn, en það kom til vegna

þess að nautakjötið var uppselt í það skiptið.

Hráefnið reyndi Kristinn að nálgast úr nærumhverfinu eins og hægt var. „Við fengum fiskinn úr fiskbúðinni á Ísafirði, ísinn fengum við frá Örnu í Bolungarvík og rabarbarann og súrurnar tíndum við þarna rétt hjá. Sjoppan Hamona á Þingeyri reddaði okkur með mjög margt annað, eins og hvítkál,
kartöflur, krydd.“

Fleiri þáttaraðir á leiðinni

Í haust verður sjónvarpað nýrri þáttaröð sem nefnist Pabbasoð, þar sem hann eldar allt í pitsuofni sem hann byggði með vini sínum í Frakklandi. „Ég fór að elda miklu meira í ofni þegar sonurinn fæddist í fyrra,“ segir

Kristinn, en það gerir hann af praktískum ástæðum. „Það er svo fyrirgefanlegt að elda í ofni. Ef strákurinn fór að skæla og þurfti mat eða athygli þá gat maður beðið aðeins með að taka matinn út. Ef þú ert að steikja eitthvað á pönnu eða sjóða þá er það ekki eins sveigjanlegt. Það getur verið helvíti hart ef pastað sýður mínútu of lengi.“

Núna er Kristinn að vinna að nýrri þáttaröð sem nefnist Soð á Austurlandi, sem verður áframhald af því óreiðueldhúsi sem hefur verið í fyrri þáttaröðum. „Við ætlum meðal annars í Mjóafjörð, inn að Hallormsstað, upp að Stóruurð og út að Þerribjörgum. Við erum að vinna handritið núna, sem er aðallega að ákveða hvert við förum,“ en Kristinn er að hefja tökur um þessar mundir. Hann reiknar svo með að klára alla eftirvinnslu á þáttunum í febrúar og þá munu þeir fara í sýningar á RÚV fljótlega eftir það. „Ef fólk er með hugmyndir að góðum upptökustöðum fyrir austan þá má það alveg senda mér skilaboð í gegnum síðuna Soð á Facebook,“ segir Kristinn.