Vinsamlegast athugið að þetta efni er eldra en 4 ára.
Dýralæknirinn og tónlistarmaðurinn Sigurður Sigurðarson.
Dýralæknirinn og tónlistarmaðurinn Sigurður Sigurðarson.
Mynd / HKr.
Líf og starf 31. október 2019

Lífslög Sigurðar dýralæknis á tveim geisladiskum

Höfundur: Hörður Kristjánsson

Sigurður Sigurðarson dýralæknir kann ýmislegt fleira fyrir sér en að hjálpa dýrum í heilsufarsvanda. Hann ólst upp við tónlist og hefur frá barnsaldri fengist við að semja lög og líka texta. Nú hefur hann með aðstoð landsþekktra listamanna sett 60 af lögum sínum á tvo geisladiska og fylgir þeim kver með textum.

Sigurður átti leið í Bændahöllina á dögunum og var þá með afrakstur tónlistarsköpunarinnar í farteskinu. Hann var að sjálfsögðu gripinn og tekinn tali og spurður um ástæður þessa gjörnings.

60 lög á 60 árum

„Á mínu heimili og í minni fjöl­skyldu hefur söngur af ýmsum toga verið iðkaður alla tíð. Ég fór því að reyna að raula og setja saman lög sjálfur þegar ég var krakki. Þessi fyrstu lög eru nú öll gleymd, þannig að þessi 60 lög sem eru á diskunum eru öll frá 60 ára tímabili, frá 1958 til 2018.“

– Þú hefur þá samið þau öll sjálfur?
„ Já, en eitt lag var endurlífgað því flestir voru búnir að gleyma því þó einhverjir myndu nokkra tóna. Því fórum við Ólöf Erla Halldórs­dóttir að reyna að rifja upp þetta lag á þeim tónabrotum sem við höfðum og gátum loks sett saman lag sem fólk taldi sig þekkja frá fyrri tíð. Þetta lag er um flöskuna: Mín blessuð blakka dúfa – blind ertu og segir klúgg, klúgg, klúgg. – Þetta lag var þekkt hér áður fyrr þó flestir hafi verið búnir að gleyma því. Öll önnur lög á diskunum eru eftir mig og 40 textar eru líka eftir mig og aðrir eftir hina og þessa vini mína og aðra.

–Þú hefur eflaust verið beðin um að taka lagið af og til, eða hvað?
„Ég hef verið í Kvæðamanna­félaginu Iðunni síðan 1989. Síðan stofnuðum við Kvæða­mannafélagið Árgala á Selfossi. Fyrir ekki löngu síðan stofnuðum við annað félag sem Snorri í Reykholti var með í að stofna. Hef ég haft mikla ánægju af að starfa í þessum félögum. Þá er ég í kór eldri borgara á Selfossi sem heitir Harpa.“

Með 28 einsöngvara

– Það hefur nú ekki alveg verið hrist fram úr erminni að koma öllum þessum lögum á plötu. Fékkstu liðstyrk við það verkefni?
„Já, það eru 28 einsöngvarar sem syngja þessi 60 lög. Sumir syngja eitt lag og aðrir tvö og einn syngur fjögur lög. Ég hef notfært mér frændur mína og kunningja og beðið þá um að syngja fyrir mig. Ef ég hef svo frétt af einhverjum líklegum sem er góður söngvari, þá hef ég reynt að ná í viðkomandi. Í þessum hópi má finna fasteignasala, þrjá bændur, óperusöngvara, barnaskólakrakka og ýmsa fleiri.

Upptakan er gerð af Karli Þór Þorvaldssyni á Selfossi sem er afskaplega lipur og hæfur maður og Hilmari Erni Hilmarssyni allsherjargoða. Þeir hafa tekið upp þessi lög fyrir mig. Þá önnuðust Edit Molnár og Miklos Dalmay undirleik ásamt Guðmundi Eiríkssyni sem einnig stílfærði fyrir mig sum lögin ásamt fleirum. Raddsetningu annaðist svo Ásgeir Sigurðsson á Selfossi.

Upptakan fór fram í hljóðstofu Karls Þórs Þorvaldssonar og í Selfosskirkju. Einnig fór upptaka fram í Keflavíkurkirkju undir stjórn Arnórs Vilbergssonar. Upptökur fóru líka fram hjá Hilmari Erni Hilmarssyni á Álftanesi, Sigfúsi Benediktssyni á Sauðárkróki og Ívari Helgasyni á Akureyri með stuðningi ýmissa hljóðfæra. Harmonikkuleik annaðist Grétar Geirsson á Áshóli í Holtum. Þá voru tvö lög tekin upp í Borgarfirði. Þar leikur Ingibjörg Þorsteinsdóttir á orgel við sálmalag. Ýmis önnur hljóðfæri skreyta síðan sum lögin.

Annars gef ég diskana út sjálfur en útlit á diskahulstrinu og fylgiriti með lögunum annaðist Ágúst Ómar Halldórsson á Akureyri. Síðan sá Jón Ingi Friðriksson í Myndbandsvinnslunni um frágang á diskunum til viðtakenda.“

Ekki verra að gera þetta en að standa í utanlandsferðum

– En eitthvað hlýtur svona útgáfa að kosta?
„Mér finnst ekkert verra að eyða peningum í þetta heldur en að standa í utanlandsferðum. Svo er ég viss um að ef ég gerði þetta ekki sjálfur þá myndu þessi lög, sem ég hef verið að semja frá því ég var tvítugur eða svo, bara gleymast,“ segir útgefandinn, laga- og textahöfundurinn og dýralæknir, Sigurður Sigurðarson. 

Mannlíf á Búnaðarþingi
Líf og starf 25. mars 2024

Mannlíf á Búnaðarþingi

Æðsta samkoma Bændasamtaka Íslands er Búnaðarþing. Í ár stóð það yfir frá fimmtu...

Stjörnuspá 21. mars - 11.  apríl
Líf og starf 21. mars 2024

Stjörnuspá 21. mars - 11. apríl

Vatnsberinn hefur lengi verið að velta því fyrir sér að flytja sig um set og jaf...

Félagsskapur eldri borgara
Líf og starf 19. mars 2024

Félagsskapur eldri borgara

Stofnfundur Félags eldri borgara í Hvalfjarðarsveit var haldinn sunnudaginn 11. ...

Áframhaldandi búseta talin möguleg
Líf og starf 13. mars 2024

Áframhaldandi búseta talin möguleg

Við Langanesströnd sem liggur að botni Bakkaflóa stendur Bakkafjörður ásamt bæði...

Kirkjugarðsklúbburinn
Líf og starf 12. mars 2024

Kirkjugarðsklúbburinn

Halaleikhópurinn víðfrægi tók að sér verkið Kirkjugarðsklúbbinn eftir Ivan Mench...

Bændamótmæli á Íslandi?
Líf og starf 11. mars 2024

Bændamótmæli á Íslandi?

Mótmæli bænda í Evrópu hafa verið í fréttum undanfarin misseri þar sem þeir vald...

Stjörnuspá 7. mars - 21. mars
Líf og starf 8. mars 2024

Stjörnuspá 7. mars - 21. mars

Vatnsberinn hefur alla burði til þess að koma í framkvæmd þeim hugmyndum sem eru...

Lundi
Líf og starf 6. mars 2024

Lundi

Lundi er algengasti fuglinn okkar og jafnframt einn af okkar einkennisfuglum. Ha...