Halldór Hafliðason hlaut bronsið

Halldór Hafliðason, matreiðslunemi í Mennta­skólanum í Kópavogi, hlaut brons­verðlaun á Ólympíuleikum ungkokka sem haldin var fyrir skömmu. Honum til aðstoðar voru Kristinn Þór Gautason og Dagur Gnýsson, auk Ægis Friðrikssonar þjálfara. Halldór er á námssamningi hjá veitingahúsinu Tides á Marriott Edition hótelinu.

Að sögn Halldórs er keppnin vanalega haldin í Kolkata á Indlandi en vegna Covid hefur hún undanfarin tvö ár farið fram í gegnum netið.
„Keppnin er fyrir kokka yngri en 23 ára og fór þannig fram að keppendum í löndunum 50 sem tóku þátt var stillt upp fyrir framan þrjár myndavélar sem voru í gangi allan tímann sem við vorum að elda.“

Pönnusteikt kjúklingabringa ásamt sætri kartöflu fylltri með linsubaunaragú.

Brons og viðurkenning fyrir hreinlæti

Þetta er í fyrsta sinn sem Halldór tekur þátt í keppninni og árangurinn glæsilegur því auk þess að vinna bronsverðlaunin, fékk hann viðurkenningu fyrir hreinlæti og ritgerð.

Að þessu sinni hlaut Ítalía gullið og Singapúr silfurverðlaunin

Kjúklingaréttur

„Í lokakeppninni fengum við það verkefni að úrbeina heilan kjúkling og gera úr honum rétt að eigin vali með fyrirfram ákveðnu hráefni og súkkulaðieftirrétt.

Rétturinn sem við matreiddum voru pönnusteiktar kjúklingabringur og rúlluðum við skinninu í heilu lagi utan um lærin og afskurðinn. Í meðlæti voru sætar kartöflur sem búið var að stinga út í bolla og fylla með linsubaunaragú sem var toppað með örvarrótarkexi.“

Með kokkablóð í æðum

Halldór á ekki langt að sækja áhuga sinn á eldamennsku því faðir hans, Hafliði Halldórsson, er margverðlaunaður matreiðslumeistari og var um tíma þjálfari og fyrirliði íslenska kokkalandsliðsins.