Gerum okkur dagamun
Nú er ekki seinna vænna en að fara að leggja línurnar fyrir sumarið og með það til hliðsjónar mun í næstu blöðum birtast yfirlit yfir helstu skemmtanir og húllumhæ hérlendis.
Hér fyrir neðan má sjá brot af því helsta sem er á döfinni í ágústmánuði, fyrir þá sem vilja gera sér dagamun, en uppákomur næstu vikna verða á dagskrá í næstu blöðum. Hér er um auðugan garð að gresja og næsta víst að ekki komist allt á lista.
Ágústmánuður
Fyrsta helgin, 2.–4. ágúst
Mikið verður um að vera víða um land um verslunarmannahelgina og teljast helstu hátíðir hér upp.
-Ein með öllu og Íslensku sumarleikarnir er fjölskylduhátíð á Akureyri.
-Innipúkinn í Reykjavík – innihátíð fyrir þá sem ekki nenna að skella sér í útilegu.
-Evrópumeistaramótið í Mýrarbolta – á Bolungarvík – Drullumallsbolti af bestu gerð ásamt skemmtilegri dagskrá á kvöldin.
-Neistaflug – Fjölskylduhátíð í Neskaupstað, tjaldmarkaður, skrúðganga, strandblaksmót, flugeldasýning og brunaslöngubolti og margt fleira.
-Þjóðhátíð í Eyjum, ein vinsælasta útihátíðin um verslunarmannahelgina.
-Norðanpönk Á Laugarbakka V-Húnavatnssýslu - Árlegt ættarmót pönkara. -Flúðir um Versló – Furðubátakeppni, brenna og margt fleira.
-Unglingalandsmót UMFÍ er vímulaus íþrótta- og fjölskylduhátíð þar sem keppt verður í hinum ýmsu íþróttagreinum.
-Síldarævintýri á Siglufirði er einstök fjölskylduhátíð fyrir unga jafnt sem aldna.
-Sæludagar KFUK og KFUM – Vinsæl og vímulaus hátíð við Eyrarvatn. Kotmót Hvítasunnukirkjunnar, Kirkjulækjarkoti í Fljótshlíð er kristilegt mót.
-Á Hraunborgum í Grímsnesi verður sundlaugarpartí, tónleikar, mínígolf o.fl.
-Kaffi Kjós í Hvalfirði býður upp á markað, brekkusöng, veiðikeppni og fleira.
-Berjadagar eru árleg tónlistarhátíð í Ólafsfirði.
Önnur helgin, 9.–11.ágúst
-Bæjarhátíðin Sumar á Selfossi er haldin árlega aðra helgina í ágúst.
-Barna-og fjölskylduhátíðin Hamingjan við hafið verður í Þorlákshöfn þann 12.ágúst.
-Gleðigangan, hápunktur Hinsegin daga sem haldnir eru í Reykjavík er 6 daga hátíð sem enginn ætti að láta fram hjá sér fara.
-Listahátíðin Act Alone er haldin árlega aðra helgina í ágúst á Suðureyri.
