Gallabuxnafár, grátið við skákborðið og brúðkaup MC
Það ríkti engin lognmolla í skákheiminum á milli jóla og nýárs. Heimsmeistaramótið í at- og hraðskák fór fram í New York og segja má að taflmennskan sjálf hafi orðið undir í fyrirsögnunum meðan á mótinu stóð.
Magnus Carlsen var rekinn úr atskákmótinu vegna undarlegra gallabuxnareglna hjá FIDE. Málið vakti mikla athygli og margir töldu FIDE ganga of langt í smámunasemi. Svo fór að sættir náðust og Magnus tók
þátt í hraðskákkeppninni og tefldi til úrslita við Ian Nepomniachtchi (Nepo).
Þegar illa gekk að ná í hrein úrslit stakk Magnus upp á því að þeir myndu einfaldlega skipta titlinum sín á milli, sem FIDE samþykkti. Væntanlega hefur FIDE ekki viljað rugga bátnum neitt frekar þegar kemur að Carlsen, eftir að friðarsamningar á milli Magnusar og FIDE náðust í kjölfar gallabuxnafársins.
Það er fordæmalaust að tveir skákmenn skipti á milli sín titli í skák, en það hefur þó gerst einu sinni á Ólympíuleikum að tveir sigurvegarar séu krýndir.
Annað sem vakti mikla athygli á mótinu í New York voru endalok skákar Vassily Ivanchuk og Daniel Naroditsky þar sem sá fyrrnefndi féll á tíma með hálfunna stöðu. Ivanchuk brast í grát við skákborðið sem var mjög átakanlegt að horfa á. Skákin getur verið harður skóli.
Magnus Carlsen giftist síðan sinni heittelskuðu Ella Victoria Malone 4. janúar sl. í Holmenkollen-kirkjunni í Noregi. Ekki er umsjónarmanni kunnugt um hvort Victoria kunni mannganginn, en Magnús var a.m.k. ekki í gallabuxum.
Ef lesendur Bændablaðsins luma á áhugaverðum skákum geta þeir haft samband, Hermann Aðalsteinsson, lyngbrekku@simnet.is
