Lúxushótel og þyrlupallur við Löngufjörur
Fyrirtækið Laxárbakki Resort ehf. stefnir að stórtækri uppbyggingu á ferðaþjónustu í Eyja- og Miklaholtshreppi.
Eigendur Laxárbakka Resort samkvæmt fyrirtækjaskrá eru að stærstum hluta hjónin Ólafur Ólafsson athafnamaður og Ingibjörg Kristjánsdóttir.
Í matsáætlun sem unnin var af Verkís segir að áformin feli í sér byggingu á 45 herbergja fimm stjörnu hóteli í hæsta gæðaflokki með heilsumiðstöð, veitingastað, þjónustuog starfsmannahúsi og allt að 19 stakstæðum frístundahúsum. Þar að auki er gert ráð fyrir þyrlupalli þangað sem gera má ráð fyrir allt að fimm flugum á dag. Aðgangur að svæðinu verður almennt takmarkaður við gesti ferðaþjónustunnar.
Jörðin Laxárbakki er 645 hektarar og afmarkast af Laxá í norðri og Stakkhamarsósi í vestri sem er hluti af Löngufjörum. Í austri liggur jörðin að Miklaholti II og Blöndulæk í suðri. Áður var Laxárbakki landbúnaðarjörð en hefur verið í eyði síðan 1947. Gert er ráð fyrir að uppbygging fari af stað árið 2027 og fari fram í áföngum, en fyrsta og stærsta áfanganum verði lokið árið 2030.
Í áðurnefndri matsáætlun er tekið fram að framkvæmdin sé innan svæðis á C-hluta náttúruminjaskrár. Það er svæði þar sem eru náttúruminjar sem ástæða þykir að friðlýsa eða friða og er þar átt við Löngufjörur. Stór hluti framkvæmdasvæðisins sé innan mikilvægs fuglasvæðis samkvæmt gögnum Náttúrufræðistofnunar Íslands og er arnaróðal á svæðinu. Framkvæmdaraðili hyggist hins vegar leggja áherslu á að byggingar, vegir og bílastæði falli vel að landslagi og náttúru svæðisins. Eins verði rask á náttúru á framkvæmdatíma lágmarkað eins og kostur er. Áætlað er að ferðaþjónustan muni skapa 300 langtímastörf, en gert er ráð fyrir að starfsfólk hafi tímabundna búsetu í starfsmannahúsum.
Opið var fyrir athugasemdir um málið í skipulagsgátt til 14. janúar. Í ítarlegri umsögn Ungra umhverfissinna segir að framkvæmdirnar muni vera á kostnað mikilvægra vistkerfa og lífvera. Er þar hvatt til þess að beina uppbyggingu sem þessari að svæðum þar sem innviðir eru þegar til staðar fremur en að raska ósnortnum og alþjóðlega mikilvægum náttúrusvæðum.
Ólafur Ólafsson hefur nokkur tengsl við sunnanvert Snæfellsnes, en í frétt á vef RÚV árið 2019 kemur fram að hann eigi líka jarðirnar Borg, Eiðhús og Miðhraun sem eru skammt frá Laxárbakka. Hjónin Ólafur og Ingibjörg eiga fasteignafélagið Festi, þar sem hann er stjórnarformaður. Eins eiga þau meirihluta í Samskipum og Landflutningum.
