Gæðamatur er dýr í framleiðslu

Edward Carr, forseti írsku samvinnuhreyfingarinnar (ICOS) segir að gæðamatvara sé bæði dýr og erfið í framleiðslu og greiða þurfi fyrir hana í samræmi við það. Irish Farmers Journal fjallar um málið.

Carr hélt erindi á aðalfundi ICOS í Portlaoise í byrjun mánaðar þar sem hann fjallaði um mikla óvissu í landbúnaðarmálum. Verð á kjöti og mjólk hefði náð nýjum hæðum vegna minnkandi framboðs á heimsvísu.

„Við lifum á áhugaverðum tímum. Þrátt fyrir að hugtakið fordæmalaust sé ofnotað þá er það lýsandi fyrir þær áskoranir sem standa frammi fyrir samvinnufélögum og matvælaframleiðendum,“ sagði Carr. Hann varaði við að þróun síðustu ára hefði gert landbúnað óspennandi starfsvettvang fyrir yngri kynslóðirnar. Kostnaður, verðbólga, langir vinnudagar og takmörkuð umbun fyrir unnin störf geri starf bænda óaðlaðandi fyrir unga fólkið. „Kannski er samfélagið loks að komast að því að gæðamatur er bæði erfiður og dýr í framleiðslu og að greiða verði fyrir hann í samræmi við það,“ sagði Carr.

Enn fremur varaði hann við því að óstöðugt ástand í heimsmálum, áhrif tollahækkana Bandaríkjastjórnar og uppgangi einræðissinna í Evrópu gæti ógnað stöðugleika. „Evrópusamstarfið og þá sérstaklega innri markaðurinn er lífsnauðsynlegur fyrir efnahagsframtíð Írlands. Við þurfum sterka leiðtoga til þess að tryggja að Evrópa haldi áfram að vinna fyrir borgara sína, þar á meðal bændur, en ekki aðeins að hugmyndafræðilegum framtíðarsýnum.“

Carr segir miklar áskoranir fram undan í fjárframlögum til landbúnaðar nú þegar Evrópusambandið undirbýr nýjan fjárhagsramma sem tekur gildi eftir árið 2027. Hann hefur áhyggjur af því að landbúnaður bíði skarðan hlut á næstu árum sem hefði neikvæð áhrif bæði á fjárhag bænda og sjálfbærnimarkmið. Sameiginleg landbúnaðarstefna Evrópusambandsins þyrfti að vera hagnýt, vel fjármögnuð og með minna regluverk. Carr kallaði eftir stefnu sem „valdeflir bændur til þess að einblína á matvælaframleiðslu, ekki skriffinnsku. Landbúnaður á Írlandi og víða í Evrópusambandinu á í erfiðleikum með að laða til sín unga bændur.“