Eplarækt eykur lífsgæði
Jörðin Elliðahvammur er smábýli Kópavogsmegin við Elliðavatn. Landið er þéttvaxið sitkagreni og ösp inni á milli grenitrjánna. Þar er einnig að finna hátt í fimmtíu mismunandi yrki af eplum.
Þorsteinn Sigmundsson, eggjabóndi að Elliðahvammi, er eldhugi í ræktun eplatrjáa auk þess sem hann elur býflugur sem sjá um að frjóvga trén. Hann ræktar epli utandyra, í köldu gróðurhúsi og í gróðurskála. Þorsteinn segir að eplaræktin veiti honum mikla hamingju, auki lífsánægju hans og lífsgæði og vitnar í Martein Lúter þegar hann segir að þótt hann vissi að það yrði heimsendir á morgun mundi hann samt planta eplatré.
Árviss uppskera í gróðurskálanum
„Ég gæti trúað að þegar allt er talið þá sé ég með 50 yrki úti og inni og allt um kring. Þar af eru um 20 í gróðurskálanum sem gefa árvissa og góða uppskeru. Eplin af öllum trjánum í skálanum eru mjög góð á bragðið en með ólíku bragði eftir því um hvaða yrki er að ræða.
Satt best að segja hef ég ekki á hraðbergi hvað þau heita en allt eru þetta yrki sem ég hef verið að safna í mörg ár og hafa reynst vel. Flest
og líklega öll koma frá norðlægum og köldum svæðum og eitt þeirra sennilega frá mjög köldu svæði í Alaska og gefur af sér vetrarepli sem eru svolítið sérstök. Eplin á því tré geta hangið á trénu allan veturinn og það er borðað á vorin. Ávöxturinn er nánast óætur á haustin, harður og bragðvondur, en bragðgóður og safaríkur á vorin.“
Uppskeran úti er ekki eins örugg og í skálanum en Þorsteinn segir að eftir gott sumar gefi eplatré utandyra af sér góð epli. „Sumarið sem nú fer að kveðja var sólarlítið og ekki gott ár fyrir útistandandi eplatré. Þau blómguðust en ég hef ekki fundið nein epli á þeim enn þá.“
Yrki sem aldrei klikkar
Þorsteinn segir að í gróðurskálanum sé tré sem skeri sig úr að því leyti hvað það gefur góða uppskeru. „Ég keypti tréð í Blómavali fyrir nokkrum árum en því miður er ég búinn að tína merkinu með nafninu á yrkinu en það tré gefur af sér hátt í hundrað bragðgóð matarepli á hverju ári og klikkar aldrei.“
Milli eitt og tvö þúsund epli
„Ég kaupi á vorin kassa af humlum og set í skálann og flugurnar sjá um að frjóvga blómin þannig að það eina sem ég þarf að gera er að vökva, sem er bara gaman og róandi, og tína eplin af. Uppskeran undanfarin ár og núna í sumar er milli eitt og tvö þúsund epli og satt best að segja og þrátt fyrir góðan vilja næ ég aldrei að borða öll eplin sjálfur.
Ég reyni að tína eplin rétt áður en þau detta sjálf af greinunum því eftir það minnkar geymsluþol þeirra. Svo gef ég fjölskyldunni, vinum og gestum og gangandi það sem ég get ekki borðað sjálfur,“ segir Þorsteinn.
