Búvörusýning í Reykjavík
Snemma árs 1984 hófst samstarf mjólkurdagsnefndar og markaðsnefndar landbúnaðarins um að koma á búvörusýningu í Reykjavík.
Á miðju ári var farið að vinna að undirbúningi sýningarinnar og þá var ákveðið að hafa hana í nýbyggingu Mjólkursamsölunnar á Bitruhálsi. Forráðamenn MS höfðu samþykkt að lána húsnæðið og til þátttöku í sýningunni var öllum helstu afurðasölufyrirtækjum innan landbúnaðarins boðið. Kemur fram í tímaritinu Frey að „Síðustu tíu daga septembermánaðar sl. var haldin mikil búvörusýning í Reykjavík. Að henni stóðu öll helstu afurðasölufélög bœnda og helstu stofnanir landbúnaðarins. Þessi glœsilega sýning bar íslenskum landbúnaði og fyrirtœkjum hans gott vitni, enda var hún vinsœl og fjölsótt.“
Jón Helgason, þáverandi landbúnaðarráðherra, opnaði sýninguna þann 21. september og jókst aðsóknin svo að fólk varð frá að hverfa vegna þrengsla. Forseti Íslands, Vigdís Finnbogadóttir, var meðal fyrstu gesta og virðist ekki hafa látið á sig fá þó mannmergð væri. Segir í Frey: „Þegar 800–1.000 manns voru komnir í einu inn á sýninguna var orðið þröngt á þingi. Samtals urðu sýningargestir 43 þúsund og síðasta dag sýningarinnar, 30. september, komu um 6.500 manns.“
Þrátt fyrir að oft væri mannmergð á sýningunni virtust gestir nær undantekningarlaust vera mjög ánægðir, nutu þess að smakka ýmislegt sem boðið var upp á og kaupa sér það sem hugurinn girntist. Á myndinni er Gerður K. Guðnadóttir, sem kynnti unnar kjötvörur frá Goða. /s
