Brögðóttur Aðalsteinn
Briddssveitir Infocapital og Hótel Norðurljósa tókust á í höfuðstöðvum Bridgesambands Íslands fimmtudaginn 15. ágúst síðastliðinn í bikarkeppni BSÍ.
Hrikti í himni og jörð, svo hart var barist. Viðureigninni lauk með sigri landsliðsspilaranna í Infocapital. Þeir Aðalsteinn Jörgensen, Birkir Jón Jónsson, Sigurbjörn Haraldsson og Bjarni H. Einarsson sáu um að skjóta sveitinni áfram í átta liða úrslit.
„Heldurðu að ég sé fæddur í gær?“
Þannig spurði Bjarni, stundum kallaður Meistarinn, liðsmann andstæðinganna þegar spurt hafði verið hvort Bjarni byggi yfir nægri kunnáttu til að hella upp á sérhæfða kaffikönnu Bridgesambandsins.
Bjarni setti vatn og kaffi í vélina, ýtti á takka og hélt svo áfram að spila.
Nokkru síðar eyðilagðist eldhúsið.
Lapþunnt kaffi flaut um öll gólf. Heilt þorp þurfti til að skúra upp óskundann. Bjarna til varnar verður þó að nefna að þótt kaffikannan léki ekki í höndum hans tókst honum betur upp með útspilin. Umsjónarmaður sá eitt slíkt skila 15 impum til Infocapital.
En spil dagsins á sveitarfélagi Bjarna, heimsmeistarinn Aðalsteinn Jörgensen.
Allt spilið:
Suður opnaði á einu hjarta, Birkir Jón Jónsson meldaði tvo tígla, pass hjá norðri og Aðalsteinn sem sat í vestur átti engan sagnkost góðan. Hann valdi að stökkva í 3 grönd.
Eftir vel heppnað laufútspil suðurs virtist spilið andvana fætt. Þeir sem ekki kunna að berjast hefðu tekið tígulslagina og sætt sig við að fara tvo niður. Aðalsteinn varð aftur á móti ekki heimsmeistari með því að gefast upp þótt útlitið virtist svart. Hann er brögðóttur og spilaði leiftursnöggt í slaf tvö spaðagosa og lét rúlla þegar suður dúkkaði. Ef suður hefði drepið og spilað aftur laufi sjá lesendur að NS hefðu skrifað 300 í sinn dálk, þrír niður. En norður var ekki með laufstöðuna á hreinu og enn meiri flækja koma upp þegar Aðalsteinn tæmdi tíglana í botn. Níundi slagur Alla kom á hjarta – og munaði um minna.
Allir undir tvítugu spila frítt
Vegna fyrirspurnar sem borist hefur briddsþætti Bændablaðsins skal áréttað að Bridgesamband Íslands hefur um skeið haft uppi þá stefnu að allir Íslendingar, tvítugir og yngri, spili frítt á öllum mótum á vegum sambandsins, engin ungmenni greiða keppnisgjöld.
Matthías Imsland, framkvæmdastjóri BSÍ, segir að með þessu vilji BSÍ styðja og hvetja unga spilara til keppnismennsku.
