Alþjóðlega Kópavogsmótið

Alþjóðlegt skákmót fór fram í Kópavogi í mars. Skákmót með þessu fyrirkomulagi hafa verið fá undanfarin ár en á sama tíma mikil eftirspurn eftir slíkum mótum. Skákdeild Breiðabliks og Helgi Ólafsson létu slag standa og stóðu að þessu glæsilega móti. Keppendur voru 10 talsins, þar af fjórir erlendir. Erlendu keppendurnir höfðu einnig teflt með sínum íslensku félagsliðum, á Íslandsmóti skákfélaga sem fjallað var um í síðasta pistli. Gátu því framlengt ferðina til Íslands! 

Af Íslendingunum stóð Vignir Vatnar Stefánsson sig best, náði þriðja sætinu á eftir stórmeisturum frá Spáni og Litháen. Hann setti vélarnar í gang eftir tap gegn alþjóðlega meistaranum og fóstbróður sínum í skákinni, Hilmi Frey Heimissyni. Vignir vann líka fyrir skömmu Boðsmót Símans í netskák!  

Hugmyndin með svona móti, er líka að veita ungum skákmönnum tækifæri til að fá svokallaða áfanga að alþjóðlegum titlum. Það tókst, en Birkir Ísak Jóhannsson náði sínum fyrsta áfanga að alþjóðlegum meistaratitili, ásamt 2300 eló-stigum, á mótinu. Birkir hefur undanfarið vakið meiri athygli sem aðstoðarmaður Vignis þegar kemur að byrjanaundirbúningi. En hann er líka grjótharður skákmaður. Einnig var Bárður Örn Birkisson um tíma afar nálægt áfanganum, en það gekk ekki upp að þessu sinni. Menn reittu vinningana hvor af öðrum, lítið um jafntefli, hvað þá stutt jafntefli. Menn voru mættir til að berjast, á Kópavogur Young Champions mótinu. Flestir Íslendingana hafa tengingu við Kópavog eða Breiðablik, og voru allir undir þrítugu. Mótið var m.a styrkt af Sigtryggssjóði, en glímukappinn Sigtryggur Sigurðsson var mikill áhugamaður um skák. 

Svona mót er glæsilegt framtak og stefnt er á að endurtaka leikinn, halda mótið annað hvert ár. Svona mót gæti líka virkað hvetjandi fyrir önnur öflug félög með skákmenn innan sinna raða í framför, og að nálgast titilhafastyrk. 

Í stöðunni sem fylgir leyfi ég lesendum að glíma við að finna eina leikinn sem tryggir hvítum jafntefli. Þetta var mikilvægur punktur fyrir Birki gegn sterkum úkraínskum stórmeistara - í áttina að alþjóðlegum áfanga! Varúð, þetta blasir ekki beint við! Ég birti lausnina í næsta blaði, en klókir geta sett stöðuna upp í tölvu ef þeir finna ekki leikinn. 

Umsjón: Gauti Páll Jónsson

gauti.pj[hjá]hotmail.com