Á misljósum mörkum

Mikið líf er í Listasafninu á Akureyri um þessar mundir. Þar standa nú yfir nokkrar sýningar eftir listafólk sem vinnur í fjölbreytilega miðla. Heimsókn í safnið er alltaf ánægjuleg, þó ekki sé nema vegna þess hvað byggingin sjálf er vel heppnuð, en að þessu sinni var ákaflega gott jafnvægi á milli hins smáa og stóra, innra og ytra, aðflutta og heimasprottna, handverks og hugmynda, manns og dýrs, manns og náttúru, reglu og óreiðu.

Sýningarnar leika margar hverjar á einhverjum mörkum, misljósum. Himnastigi Barböru Long minnir jafnt á innviði skógar og mannslíkama, strúktúr lífsins sem teygir sig til himins og leitar þar endanleikans. Mörkin á milli hins innra og ytra eru sömuleiðis óljós í verkum Bergþórs Morthens, Öguð óreiða, sem jafnframt spila á mörk málverks og skúlptúrs.

James Merry er að vissu leyti á sömu mörkum í andlitsgrímum sínum, Nodens, Sulis og Taranis, en James er breskur myndlistarmaður sem hefur búið og starfað á Íslandi í áratug og er líklega þekktastur sem tíður samstarfsmaður Bjarkar Guðmundsdóttur. Grímurnar eru innblásnar af rómverskkeltneskum fornleifafundi í Bretlandi. Þær hylja um leið og þær draga fram hið innra og dulda.

Sýningin Femina Fabula vinnur á mörkum hins mannlega og dýrslega, manns og náttúru. Hún samanstendur af sex myndbandsverkum sem gestir geta horft á í sýndarveruleikagleraugum. Þau fjalla öll um kvenleikann og sköpunarkraftinn. Áberandi er árekstur hins mannlega og dýrslega, vitsmuna og hvatalífs. Sýningin byggir á hugmyndum sviðslistakennaranna Kajsa Bohlin, Lalla la Cour, Anna Stamp, Noora Hannula, Tubna Keles og Linh Le. Verkin urðu til í samvinnu þeirra við myndlistarkonuna Kirsty Whiten og leikstjórann Kristján Ingimarsson, sem er listrænn stjórnandi sýningarinnar.

Ýmir Grönvold sýnir verk innblásin af náttúrunni, vaxtarog hringrásarferlum hennar. Endurtekningar eru áberandi í formum og litum, regla sem sprettur úr óreiðu.

Að lokum skal getið samtals á milli tveggja kynslóða listamanna frá Akureyri. Óli G. Jóhannsson sýnir verk undir titlinum Lífsins gangur og afabarn hans, Sigurd Ólason, sýnir verk undir titlinum DNA afa. Verk Sigurds bera nafn með réttu enda bera þau þess skýr merki að vera máluð undir áhrifum frá afa listamannsins. Úr verður skemmtilegt samtal.

Það er með öðrum orðum ýmislegt að sjá í Listasafninu á Akureyri þessa dagana og óhætt að mæla með heimsókn.