Vert að lofa velgengni forvarna í írskum landbúnaði

Árlega koma út ársskýrslur ársins á undan um ýmis mál í byrjun árs. Nokkrum sinnum hef ég vitnað til H.S.A. (Helth and Safety Authority) á Írlandi sem mætti kalla „heilbrigðisstofnun Írlands“. 

 

Undir H.S.A. eru allar stofnanir sem hafa með forvarnir, slys og heilbrigðismál að gera á Írlandi. Eftir útkomu ársskýrslu um banaslys á Írlandi fyrir árið 2014 þar sem 30 banaslys urðu í írskum landbúnaði það ár var lagt upp með áherslur sem beindust að farsímanotkun, börnum undir 17 ára aldri, hættu á gaseitrun frá haughúsum og starfsmönnum sem voru 55 ára og eldri. Árangurinn var að á síðasta ári létust 18 við landbúnaðarstörf sem reiknast nálægt 40% fækkunar slysa við landbúnað.

 

100% árangur í tveim áhersluatriðum

 

H.S.A. þakkar velgengnina fyrst og fremst auknu fjármagni til forvarna. Alls voru 55 banaslys á Írlandi á síðasta ári. Í héruðunum 21 á Írlandi koma verst út vinsælustu ferðamannahéruðin tvö vegna mikillar aukningar ferðamanna samfara aukningu umferðar á þröngum vegum héraðanna. Árangurinn af áherslunum var bestur varðandi haughúsin þar sem enginn lést, einnig var ekkert slys sem mátti rekja til farsímanotkunar, 50% færri slys barna, en svipað margir sem voru yfir 55 ára létust og árið áður.

 

Barátta og virkur gagnagrunnur síðan fyrir 1990

 

H.S.A. hefur gefið út mikið af bæklingum, veggspjöldum og verið með starfsmenn sem fara í heimsóknir sem bæði fræða og laga það sem þarf. Í fréttakynningarriti frá H.S.A. þar sem vitnað var í forstjóra H.S.A. og ráðherra atvinnu og heilbrigðismála voru þeir sammála um að árangurinn væri góður en aldrei mætti slaka á í forvörnum. Tölur og skýrslur einfaldlega sýndu að um leið og slakað væri á þá yrði aukning á slysum. Einnig voru þeir sammála um að það eina sem þeir væru ráðþrota í væri að fækka slysum í landbúnaði hjá þeim sem eru eldri en 55 ára þrátt fyrir mikla áherslu á þennan aldurshóp, en fyrir nokkrum árum voru gefnir út sérstakir forvarnarbæklingar sem ætlaðir voru fyrir markhóp sem er eldri en 65 ára.