Minna fjármagn til loftslagsaðgerða í landbúnaði

Framlag stjórnvalda til innleiðingar loftslagsaðgerða í landbúnaði verður skert um 40 milljónir króna á næsta ári samkvæmt fjárlagafrumvarpi 2027.

Gert er ráð fyrir 87 milljóna króna framlagi til verkefnisins að teknu tilliti til 40 milljóna króna aðhaldsráðstöfunar.

Í útgefinni aðgerðaáætlun stjórnvalda um samdrátt í losun gróðurhúsalofttegunda og aukna kolefnisbindingu er sérstakur flokkur helgaður aðgerðum í landbúnaði.

Undir þann málaflokk fellur sú losun gróðurhúsalofttegunda sem verður til við ýmsa ferla í landbúnaði, bæði við búfjárhald, landnotkun og áburðarnotkun og bruna jarðefnaeldsneytis við notkun tækja og vinnuvéla. Aðgerðir vegna losunar í landbúnaði skiptast í fjögur viðfangsefni; loftslagsvænni landbúnað, áburðarnotkun í landbúnaði, búfé og framræst ræktarland.