Hvenær þarf maður hjálp við vinnu?

Á heilli mannsævi eru misjöfn verk sem hver og einn þarf að vinna og alltaf má finna menn sem vilja gera allt sjálfir, einir og án hjálpar. Við lestur á ýmsum forvarnarbæklingum hef ég rekist á marga fróðlega lesningu um vinnuvernd og samantektir slysa við landbúnaðarstörf. 

 

Á Írlandi var gefinn út vandaður bæklingur þar sem markhópurinn voru bændur sem orðnir voru 65 ára og eldri. Í bæklingnum voru teiknaðar myndir svipaðar og í nýja bæklingnum sem BÍ var að gefa út. Í þessum bæklingi voru margar teikningar um hvernig á að fara upp í og niður úr dráttarvél. Aðferðina mætti kalla þrítengingu sem kemur frá að þegar stigið er í báða fætur þá er önnur höndin að færast upp eða niður og þegar báðar hendur hafa tak er annar fóturinn á leið upp eða niður. Í bæklingnum voru u.þ.b. 10 teikningar upp í dráttarvélina og aðrar 10 niður til útskýringar.

 

Framleiðendur John Deere ötulir að kosta forvarnir í USA

 

Í Ameríku er mesta áherslan lögð á forvarnir fyrir börn á sveitabýlum, en oft er notast við barnaskóla til að koma áherslunum heim á býlið í gegnum börnin. Það sem börnin læra í skólanum, sem er spennandi og gaman, þá segja þau frá náminu heima og þannig er skilaboðunum komið heim á býlið. Þessi aðferð í gegnum börnin hefur gefist vel í Ameríku í ýmsum forvörnum.  Stundum telur maður sig geta allt (ég er einn af þeim, nema að ég kann ekki að syngja). Að fá hjálp finnst sumum merki um linkind, en að fá hjálp við erfið verk er ekkert nema skynsemi. John Deere dráttarvélaframleiðandinn hefur gefið út og kostað mikið af forvarnarbæklingum  og í einum af bæklingum frá John Deere sá ég góða ábendingu þar sem talað var um erfiða vinnu. Þar var nefnd sérstaklega sú vinna að þegar skipta þarf um dekk á vélum ættu menn aldrei að vera einir við þá vinnu ef dekkið sem skipta á um er svipað að þyngd og maður sjálfur. Ef dekkið er þyngra en þú sjálfur, fáðu hjálp þér til öryggis, sagði í þessum bæklingi.