Græn bílastæði tekin í notkun á Akureyri
Höfundur: Margrét Þóra Þórsdóttir
Háskólinn á Akureyri hefur á undanförnum árum verið leiðandi í innleiðingu á umhverfisvænum lausnum í sínum rekstri. Nýjasta verkefnið er að bjóða ívilnun á bílastæðum skólans, þ.e. betra aðgengi og frítt rafmagn fyrir þá sem koma á umhverfisvænum bílum.
Um er að ræða sex græn bílastæði. Tvö þeirra eru klukkustæði næst háskólabyggingunum en fjögur gefa fólki kost á að hlaða rafmagnsbílana sína á dagvinnutíma eða opnunartíma skólans. Í þessi stæði má einungis leggja bílum sem geta gengið fyrir hreinum innlendum orkugjöfum eins og metani eða rafmagni.
Ódýr aðgerð fyrir skólann
Nýju bílastæðin voru formlega tekin í notkun á dögunum. Eyjólfur Guðmundsson, rektor Háskólans á Akureyri, lagði af því tilefni áherslu á að rafvæðing íslenska bílaflotans væri í raun aðgerð sem allir gætu tekið þátt í. Með því að veita starfsmönnum og nemendum aðgengi að hefðbundnu rafmagni þá geti eigendur rafbíla hlaðið bílana sér að kostnaðarlausu. Ekki er um hraðhleðslustöðvar að ræða heldur nota eigendur eigin búnað til að setja í samband við hefðbundna 16 ampera innstungu. Bílar nemenda og starfsfólks standa yfirleitt í nokkra klukkutíma á dag við skólann og því nýtist tíminn til hefðbundinnar hleðslu. „Þetta er ódýr aðgerð fyrir skólann en er framlag HA til þess að auðvelda rafbílavæðingu og notkun annarra vistvænna orkugjafa,“ sagði Eyjólfur.
Leggja sitt af mörkum
Í lok síðasta árs og í kjölfar loftslagsráðstefnunnar í París í byrjun desember buðu FESTA og Reykjavíkurborg stofnunum og fyrirtækjum að skrifa undir sameiginlega yfirlýsingu um markmið í loftslagsmálum. Háskólinn á Akureyri tekur virkan þátt í minnkun á losun gróðurhúsalofttegunda með því að minnka útblástur frá bifreiðum. Starfsmenn HA leigja bifreiðar í ferðum til Reykjavíkur og á hinum ýmsu stöðum um land allt. Nýjar reglur háskólans munu kveða á um að starfsmenn þurfi að leigja rafmagnsbíl ef vegalengdir þeirra verða 100 km eða styttri í hverri leigu, en mega líka kjósa sér rafmagnsbifreið sjálfir þó um lengri vegalengdir sé að ræða. Með þessu móti er stuðlað að því að draga verulega úr fótspori Háskólans á Akureyri gagnvart losun gróðurhúsalofttegunda, segir í frétt á vef skólans.
