Peugeot Partner er smár og knár sendibíll með mjög vel útfærða innréttingu og smekklegur í útliti.
Peugeot Partner er smár og knár sendibíll með mjög vel útfærða innréttingu og smekklegur í útliti.
Mynd / ÁL
Fræðsluhornið 22. júní 2022

Margverðlaunaður sendibíll - prufukeyrsla á Peugeot Partner

Höfundur: Ástvaldur Lárusson

Nýlega fór sá er þetta skrifar á stúfana og prufukeyrði hinn margverðlaunaða Peugeot Partner sendibíl sem Brimborg selur.

Ástæðan fyrir áhuga mínum á að prufa þennan bíl frekar en annan er vegna þess hve mörg verðlaun bíllinn hefur hlotið. Hann ber meðal annars titilinn International Van of the Year 2019, sem eru verðlaun fjölþjóðlegs hóps bílablaðamanna, auk þess sem breska tímaritið Parker setti þá á toppinn yfir bestu litlu sendibílana í nokkur ár.

Bíllinn sem ég prufukeyrði var L1-Van Pro útgáfan. L1 stendur fyrir styttra hjólabil, en hægt er að fá aðeins lengri L2 útgáfu.

Pro stendur fyrir aukahlutapakka og þrjú sæti, þannig að umræddur bíll var vel útbúinn.

Stór ættbogi sendibifreiða

Peugeot Partner tilheyrir fjölskyldu sendibíla sem allir eru í raun sami bíllinn fyrir utan smá blæbrigðamun á útliti og búnaði. Systkini Peugeot Partner eru Citroën Berlingo, Opel Combo og Toyota Proace City. Það er því hægt að yfirfæra margt af því sem hér kemur fram yfir á hina bílana.

Að þessu sinni keyrði ég 1,5 l dísilvél, en allir áðurnefndir bílar munu koma til landsins sem rafmagnsbílar á næstu vikum eða mánuðum og mun ég eflaust reyna einhvern þeirra til samanburðar.

Ökumannshúsið

Í ökumannshúsinu má finna ýmsar sniðugar lausnir hvað varðar hirslur og notagildi rýmisins afar gott.

Ég vil sérstaklega nefna hliðarborðið sem er staðalbúnaður í Pro útfærslunni. Með því að fella niður sætisbakið á miðjusætinu dregur maður fram lítið borð sem er mátulega stórt til þess að vera með fartölvu eða spjaldamöppu. Ég hef oft rekið mig á að handfrjálsi búnaðurinn í sendibílum sem þessum er svo lélegur að hann er alveg ónothæfur. Ég prufaði hins vegar að tengja símann í gegnum Bluetooth sem var mjög fljótlegt og einfalt og heyrðist rödd mín hátt og skýrt við notkun.

Farþegasætið lagt niður og lúgan aftur í farangursrýmið opin. Með þessu lengist farangursrýmið um 1,2 metra.

Pro útfærslan er líka með sniðuga lausn í farþegasætinu. Ýmist er hægt að lyfta sessunni upp til þess að fá pláss fyrir háan kassa inni í ökumannshúsinu. Þá er einnig hægt að draga sætisbakið fram og fella sætið niður í gólfið. Fyrir aftan sætisbakið leynist lúga aftur í farangursrýmið og með hana opna lengist farangursrýmið um 1,2 metra.

Farangursrýmið
Nytsamlegt farangursrými.

Farangursrýmið er eins og við er að búast af sendibíl af þessari stærð; rúmgóður og einfaldur kassi sem rúmar auðveldlega tvö vörubretti. Rýmið er með góðu aðgengi frá öllum hliðum, með rennihurðum beggja vegna og afturhlerum sem hægt er að opna í 180 gráður. Peugeot býður upp á topplúgu að aftan sem getur verið gagnleg ef flytja þarf langar fjalir eða stiga. Hins vegar er ekki hægt að fá bæði, svo velja þarf annað hvort topplúgu eða tvær rennihurðir.

Ég tel þó algjöran óþarfa að vera með topplúgu á Pro bílnum vegna áðurnefndrar lúgu yfir í ökumannshúsið. Afturhlerarnir eru þannig útbúnir að hægt er að hafa annan þeirra opinn í akstri. Því er hægt að flytja hluti sem ná frá mælaborðinu og út um afturhlerann.

Styttri L1 bíllinn er með 559 kg hleðslugetu á meðan lengri útgáfan L2 má bera 843 kg.

Aksturseiginleikar

Á þeim tíma sem reynsluakstur fór fram lagði ég mig fram við að prufa bílinn við sem flestar aðstæður sem standa til boða snemma sumars; akstur í þungri umferð, á þjóðvegi og á grófum malarvegi.

Ég fann það strax að bíllinn er ekki hugsaður til langferða en við akstur heyrast mikil veg- og vindhljóð ásamt því að ökumannssætið er ekki það þægilegasta. Þar af leiðandi má gera ráð fyrir að maður verði þreyttur í eyrunum og skrokknum eftir langa bílferð. Fjöðrunin á þessum Peugeot er hins vegar mjög mjúk og þegar ég ók á malarveginum tók ég eftir því hversu vel bíllinn tókst á við gróf þvottabretti og holur. Lausamölin virtist ekki valda miklum vandræðum heldur. Þó svo að þetta sé smár bíll þá jafnast aksturseiginleikar bílsins á malarvegi á við jeppling eða jeppa, fyrir utan áðurnefnt veghljóð.

Á þjóðvegum er bíllinn fljótur að ná upp aksturshraða og gírkassinn léttur og þægilegur í meðförum.

Ég er sjálfur 191 á hæð og mér fannst gírstöngin vera heldur langt frá mér eins og ég var með sætið stillt.

Smátt stýri sem er einkennandi fyrir Peugeot.

Það sem skilur þennan Peugeot Partner frá áðurnefndum systkinum sínum er smágert stýrið og smekkleg innréttingin. Stýrið er það lítið og mælarnir það hátt uppi að maður horfir á hraðamælinn fyrir ofan stýrið, ekki í gegnum það eins og gengur og gerist. Mér þykir það mjög þægileg uppsetning og smátt stýrið ákjósanlegt í innanbæjarakstri.

Samantekt

Peugeot Partner er smár og knár sendibíll með mjög vel útfærða innréttingu. Farangursrýmið er rúmgott og nytsemi þess eykst umtalsvert vegna lúgu inn í ökumannshúsið. Bíllinn er með mjúka fjöðrun og er þægilegur í keyrslu. Helsti gallinn er veg- og vindhljóð við akstur, en það sama á líklegast við um flesta sendibíla í þessum stærðarflokki.

Listaverðið á Peugeot Partner L1 er 3.990.000 krónur með vsk. Bíllinn sem ég prufaði var af Pro útgáfunni með nokkrum aukahlutum, eins og rennihurðum báðum megin og margmiðlunarskjá með bakkmyndavél. Sá bíll kostar 4.525.000 krónur með vsk.

Skrifborð sem hentar undir fartölvu eða spjaldamöppu.

Stíllhreinn og sterklegur pallbíll
Fræðsluhornið 30. júní 2022

Stíllhreinn og sterklegur pallbíll

Að þessu sinni var pallbíllinn Isuzu D-Max Lux, sem BL selur, tekinn í reynslu...

Kvígur frá NautÍs
Fræðsluhornið 30. júní 2022

Kvígur frá NautÍs

Uppbygging hreinræktaðrar Angushjarðar hjá Nautgriparæktarmiðstöð Íslands á ...

Angus-holdanaut frá NautÍs fædd 2021
Fræðsluhornið 29. júní 2022

Angus-holdanaut frá NautÍs fædd 2021

Hér er nú kynntur fjórði árgangur Angus-holdanauta frá Nautgriparæktarmiðst...

Fagþing nautgriparæktarinnar í Danmörku – Fyrsti hluti
Fræðsluhornið 29. júní 2022

Fagþing nautgriparæktarinnar í Danmörku – Fyrsti hluti

Nýverið var haldið hið árlega Fagþing Nautgriparæktarinnar í Danmörku, eða „...

Reyniviður
Fræðsluhornið 28. júní 2022

Reyniviður

Reyniviður, Sorbus aucuparia, er um margt sérstætt tré. Til dæmis myndar reyni...

Svartþröstur
Fræðsluhornið 28. júní 2022

Svartþröstur

Svartþröstur er orðinn algengur varpfugl á Suðvesturlandi, einna helst í þét...

Ný og endurbætt spenaeinkun
Fræðsluhornið 27. júní 2022

Ný og endurbætt spenaeinkun

Á síðastliðnu búgreinaþingi Deildar kúabænda var því beint til fagráðs í ...

Krydd í tilveruna - fyrri hluti
Fræðsluhornið 25. júní 2022

Krydd í tilveruna - fyrri hluti

Þrátt fyrir að aldalöng hefð sé fyrir notkun og ræktun kryddjurta veit enginn...